ఫరీదాబాద్: హర్యానాలోని ఫరీదాబాద్‌లో మానవత్వాన్ని సిగ్గుపడేలా చేసే ఒక దారుణ ఘటన వెలుగులోకి వచ్చింది. నగరంలో కదులుతున్న వ్యాన్‌లోనే ఒక మహిళపై సామూహిక అత్యాచారం (గ్యాంగ్‌రేప్) జరిగింది. ఈ మృగత్వానికి బలైన బాధితురాలికి సంబంధించిన ఒక గుండెను కలిచివేసే వీడియో ఇప్పుడు బయటకు వచ్చింది. అందులో ఆమె ఆ రాత్రి జరిగిన దారుణాన్ని వివరించింది.
సహాయం చేస్తామనే నెపంతో తనను వ్యాన్‌లోకి ఎక్కించుకుని, ఆపై హద్దులు దాటి ప్రవర్తించారని ఆమె ఆవేదన వ్యక్తం చేసింది.
లిఫ్ట్ ఇచ్చే నెపంతో వల వేసి..
బాధితురాలు వీడియోలో తెలిపిన వివరాల ప్రకారం.. ఆమె వయస్సు 26 ఏళ్లు. డిసెంబర్ 29న ఇంట్లో తల్లితో ఏదో విషయంలో గొడవ జరగడంతో కోపంగా తన స్నేహితురాలి ఇంటికి వెళ్లింది. అక్కడి నుండి అర్ధరాత్రి 12 గంటల సమయంలో తిరిగి ఇంటికి వస్తుండగా, కళ్యాణ్‌పురి వెళ్లడానికి వాహనం కోసం వేచి చూస్తోంది. అప్పుడే ఒక ఈకో వ్యాన్ అక్కడ ఆగింది. అందులో ఇప్పటికే ఇద్దరు వ్యక్తులు ఉన్నారు. సహాయం చేస్తారని భావించి ఆమె వారిని లిఫ్ట్ అడిగింది.
డబ్బులు ఇచ్చి.. మృగాల్లా ప్రవర్తించి..
వ్యాన్ ఎక్కిన తర్వాత నిందితులు ఆమెను మాటల్లో పెట్టారు. “నువ్వు చాలా ఇబ్బందుల్లో ఉన్నట్టున్నావు, నీ పిల్లల కోసం నీ అకౌంట్‌లో కొన్ని డబ్బులు వేస్తాను” అని ఒక నిందితుడు ఆమె ఖాతాలోకి 600 రూపాయలు బదిలీ చేశాడు. ఆ వెంటనే వారి అసలు రూపం బయటపడింది. ఆమెపై దాడి చేసి, చెంపదెబ్బలు కొట్టి వ్యాన్ వెనుక సీటులోకి లాగారు. అక్కడ ఇద్దరూ ఒకరి తర్వాత ఒకరు ఆమెపై అత్యాచారానికి ఒడిగట్టారు. ఆమె ప్రతిఘటించగా.. “మాట వినకపోతే గుర్గావ్‌కు తీసుకెళ్లి లోతైన లోయలో పడేస్తాం” అని బెదిరించారు.
పోలీసుల చర్య – బాధితురాలి పరిస్థితి
ఈ దారుణానికి పాల్పడిన తర్వాత నిందితులు ఆమెను ఇంటి దగ్గర వదలకుండా సైనిక్ కాలనీ వైపు తీసుకెళ్లారు. ఆమె ఎవరికీ ఫోన్ చేయకుండా మొబైల్ ఫోన్ కూడా లాక్కున్నారు. అయితే, ఈ కేసులో పోలీసులు వేగంగా స్పందించి ఇద్దరు నిందితులను అరెస్టు చేసి జైలుకు పంపారు. ప్రస్తుతం బాధితురాలి పరిస్థితి విషమంగా ఉంది. ఒక ప్రైవేట్ ఆసుపత్రిలో ఆమెకు చికిత్స జరుగుతోంది. ఇప్పటికే ఆమె భుజానికి ఒక ఆపరేషన్ పూర్తయిందని, త్వరలో మరో సర్జరీ చేయాల్సి ఉంటుందని వైద్యులు తెలిపారు.