నైజీరియా కాల్పులు: ఉత్తర నైజీరియాలోని ఒక గ్రామంపై సాయుధ దుండగులు విచక్షణారహితంగా కాల్పులు జరిపారు. ఈ దాడిలో 30 మందికి పైగా ప్రాణాలు కోల్పోయారు. ఈ విషయాన్ని ధృవీకరించిన పోలీసు అధికారులు, మరికొంతమందిని దుండగులు అపహరించుకుపోయారని వెల్లడించారు.
దాడి ఎప్పుడు జరిగింది?
పోలీసుల సమాచారం ప్రకారం.. శనివారం సాయంత్రం ఆయుధాలతో వచ్చిన దుండగులు నైజర్ రాష్ట్రంలోని బోర్గు పరిపాలనా పరిధిలో ఉన్న కసువన్-దాజీ గ్రామంపై విరుచుకుపడ్డారు. గ్రామంలోకి ప్రవేశించగానే వారు కనిపించిన వారిపై విచక్షణారహితంగా కాల్పులు జరిపారు. అంతేకాకుండా స్థానిక మార్కెట్‌తో పాటు పలు ఇళ్లకు నిప్పు పెట్టారు. అపహరణకు గురైన వారి కోసం భద్రతా బలగాలను మోహరించినట్లు నైజర్ రాష్ట్ర పోలీస్ ప్రతినిధి వాసియు అబియోదున్ ఒక ప్రకటనలో తెలిపారు.
మృతుల సంఖ్య పెరిగే అవకాశం
అంతర్జాతీయ వార్తా సంస్థ ఏపీ (AP) కథనం ప్రకారం.. కనీసం ఇద్దరు గ్రామస్తులు మృతుల సంఖ్య 37 అని తెలిపారు. ఆదివారం నాటికి ఇంకా చాలా మంది ఆచూకీ లభించకపోవడంతో ఈ సంఖ్య మరింత పెరిగే అవకాశం ఉందని వారు ఆందోళన వ్యక్తం చేస్తున్నారు. పోలీసులు భద్రతా బలగాలను పంపామని చెబుతున్నప్పటికీ, క్షేత్రస్థాయిలో ఇంకా ఎవరూ రాలేదని గ్రామస్తులు ఆరోపిస్తున్నారు.
నైజీరియాలో ఇటువంటి సాయుధ ముఠాల దాడులు, దోపిడీలు మరియు అపహరణలు ఇటీవలి కాలంలో తీవ్ర కలకలం రేపుతున్నాయి.