చెన్నై స్టాన్లీ ప్రభుత్వ వైద్య కళాశాల పరిశోధకులు జరిపిన తాజా అధ్యయన ఫలితాలు అందరినీ ఆశ్చర్యపరుస్తున్నాయి. మన సాంప్రదాయ ‘చద్ది అన్నం’ ప్రేగు సంబంధిత వ్యాధులను నయం చేయడంలో అద్భుతంగా పనిచేస్తుందని ఈ పరిశోధన నిరూపించింది.
పోషకాల గని: సాధారణంగా 100 గ్రాముల వండిన అన్నంలో 3.5 మి.గ్రా ఇనుము (Iron) ఉంటుంది. అదే అన్నాన్ని 12 గంటల పాటు నీటిలో నానబెట్టి ‘చద్ది అన్నం’గా మార్చినప్పుడు, అందులోని ఇనుము శాతం 74 మి.గ్రా వరకు అంటే సుమారు 21 రెట్లు పెరుగుతుందని పరిశోధనలు ధృవీకరించాయి. రక్తహీనతతో బాధపడే గర్భిణీ స్త్రీలకు ఖరీదైన మందుల కంటే ఈ చద్ది అన్నం ఒక వరం లాంటిది.
ప్రయోజనాలు:
- విటమిన్లు: చద్ది అన్నంలోని బ్యాక్టీరియా విటమిన్ B1, B6, B12లను ఉత్పత్తి చేయడంలో సహాయపడుతుంది. ఇందులో పీచు పదార్థం (Fiber) మరియు ఖనిజాలు పుష్కలంగా ఉంటాయి.
- ప్రోబయోటిక్స్: అన్నం పులియడం (Fermentation) వల్ల అందులో సహజమైన ‘మంచి బ్యాక్టీరియా’ (Probiotics) వృద్ధి చెందుతాయి. ఇవి జీర్ణక్రియను మెరుగుపరచడమే కాకుండా, ప్రేగుల లోపలి పొరను (Mucus layer) రక్షించి రోగనిరోధక శక్తిని పెంచుతాయి.
- ఐబీడీ (IBD) నివారణ: ప్రేగు వాపు వ్యాధి (Inflammatory Bowel Disease) ఉన్న రోగులకు స్టాన్లీ ఆసుపత్రి వైద్యులు గత కొన్ని ఏళ్లుగా సర్జరీలకు బదులుగా చద్ది అన్నం మరియు తగిన మందులతో చికిత్స అందిస్తూ విజయవంతంగా నయం చేస్తున్నారు.
తమిళనాడు ప్రభుత్వం ఈ పరిశోధన కోసం రూ. 2.7 కోట్లు కేటాయించింది. అమెరికా పోషకాహార శాస్త్రవేత్తలు కూడా ఈ చద్ది అన్నం యొక్క గొప్పతనాన్ని కొనియాడుతూ నివేదికలు సమర్పించడం విశేషం. కాబట్టి, ఇకపై మిగిలిన అన్నాన్ని పారేయకుండా, నీళ్లు పోసి మరుసటి రోజు ఉదయం తీసుకుంటే ఆరోగ్యానికి ఎంతో మేలు జరుగుతుంది.