మీరు కారులో లేదా బస్సులో ప్రయాణిస్తున్నప్పుడు కొద్దిసేపటికే వికారం (Nausea) మొదలవుతుందా? దీనిని ‘మోషన్ సిక్‌నెస్’ (Motion Sickness) అంటారు. ముఖ్యంగా కొండ ప్రాంతాల్లో ప్రయాణించేటప్పుడు లేదా బస్సులో వెనుక సీట్లలో కూర్చున్నప్పుడు చాలామందికి వాంతులు, తల తిరగడం వంటి సమస్యలు ఎదురవుతాయి.
దీనివల్ల ప్రయాణంలోని ఆనందం మొత్తం పోతుంది. ఒకవేళ మీ దగ్గర మందులు లేకపోయినా, ఈ కింద చెప్పిన సులభమైన ఏక్యుప్రెషర్ (Accupressure) ట్రిక్‌తో మీరు వెంటనే ఉపశమనం పొందవచ్చు.
ఆ ఒక్క ఏక్యుప్రెషర్ పాయింట్ ఏది?
యోగా ఇన్‌స్ట్రక్టర్ మాళవిక పంత్ తెలిపిన వివరాల ప్రకారం, మన మణికట్టు లోపలి భాగంలో ఒక పాయింట్ ఉంటుంది. దీనిని మసాజ్ చేయడం ద్వారా వాంతులు మరియు వికారం వెంటనే తగ్గుతాయి.
దీనిని ఎలా గుర్తించాలి?
- మీ అరచేతిని పైకి ఉంచండి.
- మణికట్టు మడత (Wrist crease) నుండి సుమారు రెండు వేళ్ల వెడల్పు కింద, మణికట్టు మధ్యలో ఉండే మెత్తటి భాగాన్ని గుర్తించండి. దీనిని P6 పాయింట్ అంటారు.
- ఈ పాయింట్‌పై మీ బొటనవేలితో సున్నితంగా నొక్కుతూ 2 నుండి 3 నిమిషాల పాటు మసాజ్ చేయండి.
- ఈ సమయంలో నిదానంగా గాలి పీల్చుకుంటూ ఉండండి.
మరికొన్ని చిన్న చిట్కాలు:
ఏక్యుప్రెషర్‌తో పాటు ఈ కింద చెప్పినవి కూడా మీకు సహాయపడతాయి:
- నిమ్మకాయ: ప్రయాణంలో మీతో పాటు ఒక నిమ్మకాయను ఉంచుకోండి. వికారంగా అనిపించినప్పుడు దానిని వాసన చూడటం లేదా కొద్దిగా నాకడం వల్ల ఉపశమనం కలుగుతుంది.
- అల్లం: చిన్న అల్లం ముక్కను నోట్లో ఉంచుకుని చప్పరించడం వల్ల వాంతులు రావు.
- పెప్పర్ మింట్ ఆయిల్: మీ దగ్గర ఈ నూనె ఉంటే, ఒక కర్చీఫ్‌పై రెండు చుక్కలు వేసుకుని వాసన చూడండి. దీని ఘాటైన వాసన వికారాన్ని తగ్గిస్తుంది.