బెంగళూరు వంటి నగరాల్లో వ్యాపారం చేయడం ఎంత కష్టమో అనే చేదు నిజాన్ని ఒక ఆస్ట్రేలియా వ్యాపారి రెండేళ్లలో అర్థం చేసుకున్నారు. గార్మెంట్స్ రంగంలో కార్మికులు పడుతున్న కష్టాలు, వారి శ్రమ దోపిడీ గురించి చదివి చలించిపోయిన 38 ఏళ్ల క్రిస్ హెచ్, తానే ఒక మోడల్ ఫ్యాక్టరీని స్థాపించి అందరికీ ఆదర్శంగా నిలవాలనుకున్నారు. కానీ ఏడాది తిరక్కుండానే కార్మికుల వింత పోకడలతో విసిగిపోయి, లక్షల రూపాయల నష్టం మూటగట్టుకుని కంపెనీని మూసివేసే స్థితికి చేరుకున్నారు.
అసలేం జరిగింది?
క్రిస్ భార్యకు బెంగళూరులో సాఫ్ట్‌వేర్ ఉద్యోగం రావడంతో రెండేళ్ల క్రితం ఆయన సిలికాన్ సిటీకి వచ్చారు. గార్మెంట్స్ కార్మికులకు తక్కువ జీతాలు, వేధింపులు ఉన్నాయని తెలుసుకుని, వారికి అండగా ఉండాలని ‘బెనివొలెన్షియా’ అనే కంపెనీని ప్రారంభించారు.
అతి మంచితనమే కొంపముంచిందా?
- భారీ జీతాలు: బయట ₹8,000 జీతం తీసుకునే టైలర్లకు క్రిస్ ఏకంగా ₹30,000 జీతం ఇచ్చారు.
- శిక్షణ: వారికి శిక్షణ ఇచ్చి పనిలోకి తీసుకునేలోపే, వారు చెప్పాపెట్టకుండా పని మానేయడం మొదలుపెట్టారు.
వింత అనుభవాలు:
- సాంస్కృతిక వ్యత్యాసం: ఒక లేడీ టైలర్ పనిని క్రిస్ మెచ్చుకున్నారు. ఒకరోజు వర్షం పడుతుంటే ఆమె షూ తడవకూడదని ఆయన దానిని పక్కకు జరిపారు. కానీ ఆస్ట్రేలియాలో సాధారణమైన ఈ మర్యాదను ఆమె భర్త తప్పుగా అర్థం చేసుకుని, భార్యను పని మాన్పించేశాడు.
- సోషల్ మీడియా మేనేజర్: ఇన్ స్టాగ్రామ్‌లో రోజుకు ఒక పోస్ట్ వేయమని ఒకరిని నియమిస్తే, అతను రెండు నెలల్లో కేవలం మూడు పోస్టులే వేశాడు.
- ఇంటర్వ్యూ వింతలు: ఇంటర్వ్యూకి వచ్చిన వారు తమ నైపుణ్యం చూపించమంటే స్పందించకపోవడం, కొందరైతే ఇంటర్వ్యూకి రావడానికి అయ్యే ఖర్చులు కూడా కంపెనీయే భరించాలని అడగడం క్రిస్‌ను ఆశ్చర్యపరిచింది.
30 లక్షల నష్టం – కొత్త పాఠాలు:
కార్మికులు నిలకడగా లేకపోవడంతో ఏడాదిలో ఆయనకు ₹30 లక్షల నష్టం వచ్చింది. దీంతో ఆయన ఒక స్థానిక వ్యక్తిని ఆపరేషన్స్ మేనేజర్‌గా నియమించుకున్నారు.
- ఆ మేనేజర్ ఇప్పుడు క్రిస్‌కు భారతీయ కార్మికులను ఎలా డీల్ చేయాలో నేర్పిస్తున్నారు.
- “పనివాళ్లతో మరీ స్నేహంగా ఉండకూడదు, కొంత దూరం పాటించాలి, అప్పుడప్పుడు బాసిజం చూపించాలి” అని ఆ మేనేజర్ చెప్పిన మాటలు విని క్రిస్ నవ్వుకుంటున్నారు.
పరిస్థితి ఇలాగే ఉంటే కంపెనీని మూసేయాలని క్రిస్ నిర్ణయించుకున్నారు.