మీ రహస్యాలు, ఫోటోలు, చాట్ మరియు లొకేషన్ తప్పుడు వ్యక్తుల చేతుల్లోకి వెళ్లడం వల్ల బ్లాక్‌మెయిల్ లేదా ఆర్థిక నష్టాలకు దారితీయవచ్చు. అందుకే ఎవరైనా మీ ప్రతి కదలికను ముందే ఊహిస్తున్నట్లు మీకు అనిపిస్తే, ఈ క్రింది సంకేతాలను గమనించండి:
నిఘా పెట్టినట్లు తెలిపే 8 సంకేతాలు:
- ఫోన్ మరియు గ్యాడ్జెట్లలో మార్పులు: మీ ఫోన్ అకస్మాత్తుగా స్లో అవ్వడం, వేడెక్కడం, బ్యాటరీ మరియు డేటా త్వరగా ఖర్చవ్వడం వంటివి జరిగితే అది స్పై యాప్స్ (Spy Apps) ఉన్నాయని సంకేతం. ఇవి బ్యాక్‌గ్రౌండ్‌లో మీ కాల్స్ మరియు లొకేషన్‌ను రికార్డ్ చేస్తూ ఉండవచ్చు.
- మీ వ్యక్తిగత విషయాలు వేరే వారికి ముందే తెలియడం: మీరు ఎవరికీ చెప్పకపోయినా.. మీ ప్రయాణం, మీటింగ్స్ లేదా కుటుంబ విషయాలను వేరే వారు మాట్లాడుతున్నారంటే, మీ డిజిటల్ డేటా లీక్ అవుతున్నట్లు అర్థం.
- మితిమీరిన ప్రశ్నలు అడగడం: కొందరు వ్యక్తులు స్నేహం పేరుతో మీ ఆఫీసు పని, ఇంట్లో ఎవరు ఉంటారు, మీ దినచర్య ఏమిటి వంటి వివరాలను చాకచక్యంగా అడుగుతుంటారు. ఇది సమాచారం సేకరించే ఒక పద్ధతి కావచ్చు.
- పదే పదే కలవడానికి లేదా ఫోన్ చేయడానికి పట్టుబట్టడం: ఎటువంటి కారణం లేకుండానే మాటిమాటికీ మీ లొకేషన్ అడగడం లేదా వీడియో కాల్ చేయమని ఫోర్స్ చేయడం మీ కదలికలను గమనించే ప్రయత్నం కావచ్చు.
- సోషల్ మీడియాలో వింత ప్రవర్తన: మీ పాత పోస్ట్‌లపై అకస్మాత్తుగా ప్రశ్నలు వేయడం లేదా మీ ఆన్‌లైన్ యాక్టివిటీని ఎప్పుడూ గమనిస్తుండటం ‘సోషల్ సర్వైలెన్స్’ (Social Surveillance) కిందకు వస్తుంది.
- నమ్మకాన్ని చూరగొనే ప్రయత్నం: అపరిచితులు మీతో అతి త్వరగా స్నేహం చేయడం, మీ సమస్యలపై అతిగా ఆసక్తి చూపడం ద్వారా మీ నుండి సమాచారాన్ని రాబట్టే ప్రయత్నం చేస్తారు. దీనినే “సోషల్ ఇంజనీరింగ్” అని పిలుస్తారు.
- ఆఫ్‌లైన్ నిఘా: మీ ఇంట్లో లేదా ఆఫీసులో కెమెరా లాంటివి కనిపించడం, మీ మాటలను ఎవరో ముందే వింటున్నట్లు అనిపించడం వంటివి ఆఫ్‌లైన్ నిఘాకు సంకేతాలు.
- సంబంధాలలో అతిగా జోక్యం చేసుకోవడం: కేవలం ప్రేమ లేదా కేరింగ్ పేరుతో మీ ఫోన్‌ను తరచుగా చెక్ చేయడం, మీరు ఎవరితో మాట్లాడుతున్నారో నిరంతరం ఆరా తీయడం ఒక రకమైన కంట్రోల్ మరియు నిఘా.
మీరు తీసుకోవాల్సిన జాగ్రత్తలు:
- వ్యక్తిగత సమాచారం: అందరికీ మీ వ్యక్తిగత విషయాలను షేర్ చేయవద్దు.
- ప్రైవసీ సెట్టింగ్స్: మీ ఫోన్ మరియు సోషల్ మీడియా అకౌంట్ల ప్రైవసీ సెట్టింగ్స్‌ను పటిష్టం చేసుకోండి.
- అప్రమత్తత: అపరిచితులు వేసే ప్రశ్నల పట్ల జాగ్రత్తగా ఉండండి.
- సాఫ్ట్‌వేర్ అప్‌డేట్: మీ ఫోన్‌ను ఎప్పటికప్పుడు అప్‌డేట్ చేస్తూ ఉండండి, తద్వారా వైరస్లు రాకుండా ఉంటాయి.