మీకు కూడా రాత్రిపూట నిద్ర పట్టడం లేదా? రాత్రంతా పక్కన కుదురు లేకుండా దొర్లుతూ ఉంటారా? ఇది తీవ్రమైన సమస్య కావచ్చు, ఎందుకంటే నిద్ర లేకపోవడం వల్ల మీ శరీర సహజ లయ (Natural rhythm) దెబ్బతింటుంది. నిద్రమాత్రలు వాడటానికి ముందే ఈ క్రింది నాలుగు సహజ సిద్ధమైన పదార్థాలను ప్రయత్నించి చూడండి.
నిద్ర ఎందుకు అవసరం?
మనం నిద్రపోయే సమయంలోనే మన శరీరంలోని కణాలు తమని తాము బాగు చేసుకుంటాయి (Repair). కొత్త కణాలు పుట్టడం, గాయాలు మానడం మరియు శారీరక ఎదుగుదల ఈ సమయంలోనే జరుగుతాయి. మీ మెదడు కూడా విశ్రాంతి తీసుకుని కొత్త సమాచారాన్ని, జ్ఞాపకాలను నిక్షిప్తం చేసుకుంటుంది. నిద్ర లేకపోతే ఈ ప్రక్రియలన్నీ దెబ్బతింటాయి.
గాఢ నిద్ర కోసం 4 అద్భుతమైన పదార్థాలు:
పోషకాహార నిపుణులు సలోనీ తెలిపిన వివరాల ప్రకారం.. ఈ 4 పదార్థాలు 1 నుండి 2 వారాల పాటు క్రమం తప్పకుండా తీసుకుంటే మీ నిద్ర నాణ్యతలో స్పష్టమైన మార్పు కనిపిస్తుంది.
- అరటిపండు (నిద్రకు 30-40 నిమిషాల ముందు): రాత్రిపూట స్నాక్స్‌గా అరటిపండును ఎంచుకోండి. ఇందులో ఉండే మెగ్నీషియం మరియు ట్రిప్టోఫాన్ కండరాలకు విశ్రాంతినిస్తాయి. ట్రిప్టోఫాన్ ‘మెలటోనిన్’ (Melatonin) అనే హార్మోన్‌గా మారి నిద్ర చక్రాన్ని క్రమబద్ధీకరిస్తుంది.
- గోరువెచ్చని పాలు: మీ జీర్ణవ్యవస్థకు పాలు పడితే, ఇది ఉత్తమమైన మార్గం. పాలలో ఉండే ట్రిప్టోఫాన్ మరియు కాల్షియం నిద్రకు సహాయపడతాయి. ఇందులో చిటికెడు పసుపు మరియు జాజికాయ పొడి కలిపితే ఆందోళన తగ్గి ప్రశాంతత లభిస్తుంది.
- గుమ్మడి గింజలు (సాయంత్రం వేళ): గుమ్మడి గింజల్లో జింక్ మరియు మెగ్నీషియం పుష్కలంగా ఉంటాయి. జింక్ లోపం వల్ల నిద్ర సరిగ్గా పట్టదు. కాబట్టి సాయంత్రం వేళ 1 నుండి 2 చెంచాల వేయించిన గుమ్మడి గింజలను తీసుకోవడం మంచిది.
- క్యామోమైల్ టీ (Camomile Tea – నిద్రకు 20 నిమిషాల ముందు): ప్రతిరోజూ రాత్రి ఈ టీ తాగే అలవాటు చేసుకోండి. ఇందులో ఉండే ‘ఎపిజెనిన్’ మెదడును ప్రశాంతపరుస్తుంది. నిద్రపోవడానికి సుమారు 20 నిమిషాల ముందు ఒక కప్పు వేడి క్యామోమైల్ టీ తాగితే నిద్ర నాణ్యత మెరుగుపడుతుందని అధ్యయనాలు చెబుతున్నాయి.
గుర్తుంచుకోవలసిన ఇతర విషయాలు:
- రాత్రి ఉరుముగా కెఫీన్ (టీ, కాఫీ) తీసుకోకండి.
- రాత్రిపూట భారీ భోజనం చేయడం మానుకోండి.