పుణేలో వీధి కుక్కల గుంపు దాడి చేయడంతో ఒక యువకుడు మృత్యువుతో పోరాడుతున్న ఘటన బుధవారం చోటుచేసుకుంది. నర్వీర్ తానాజీ మాలుసరే రోడ్డు (సింహగడ్ రోడ్డు) సమీపంలోని నర్హే ప్రాంతంలో బుధవారం తెల్లవారుజామున 2:30 గంటల సమయంలో ఈ దారుణం జరిగింది.
ఈ ఘటనలో ధాయరి ప్రాంతానికి చెందిన అక్షయ్ ప్రకాష్ చవాన్ తీవ్రంగా గాయపడ్డాడు. కుక్కల గుంపు అతడి శరీరాన్ని ఇష్టారాజ్యంగా పీక్కుతిన్నాయి.
అసలేం జరిగింది?
అక్షయ్ చవాన్ తన స్నేహితుడు సునీల్ బావధనేతో కలిసి నర్హే-వడ్గావ్ రోడ్డులోని ఒక వైన్ షాప్ సమీపానికి వచ్చాడు. అతిగా మద్యం సేవించి ఉండటంతో అక్షయ్ నియంత్రణ కోల్పోయి నేలపై పడిపోయాడు. అతను కింద పడగానే, అక్కడే ఉన్న ఏడు నుండి ఎనిమిది వీధి కుక్కలు ఒక్కసారిగా అతనిపై విరుచుకుపడ్డాయి. మద్యం మత్తులో ఉన్న అక్షయ్ ఆ కుక్కలను ప్రతిఘటించలేకపోయాడు. కుక్కలు అతడిని సుమారు 10 అడుగుల దూరం ఈడ్చుకుంటూ తీసుకెళ్లాయి.
ఉదయం వరకు రోడ్డుపైనే..
కుక్కలు అక్షయ్ యొక్క చెవులు, ముక్కు మరియు శరీర భాగాలను పీక్కుతిన్నాయి. రక్తపు మడుగులో అపస్మారక స్థితిలో ఉన్న అక్షయ్, తెల్లవారుజామున దాడి జరిగినా ఉదయం 9 గంటల వరకు రోడ్డుపైనే పడి ఉన్నాడు. ప్రయాణికులు చూసినా ఎవరూ సహాయం చేయడానికి ముందుకు రాలేదు. చివరకు ఉదయం 9 గంటలకు పారిశుధ్య కార్మికులు గమనించి పోలీసులకు సమాచారం అందించారు. ప్రస్తుతం అక్షయ్ ససూన్ ఆసుపత్రిలో చికిత్స పొందుతున్నాడు, అతని పరిస్థితి విషమంగా ఉన్నట్లు సమాచారం.
సుప్రీంకోర్టు కీలక వ్యాఖ్యలు
మరోవైపు, వీధి కుక్కల నియంత్రణపై సుప్రీంకోర్టు గురువారం కీలక వ్యాఖ్యలు చేసింది. “రోడ్లను కుక్కల రహితంగా మార్చాలని మేము ఆదేశించలేదు, కానీ యానిమల్ బర్త్ కంట్రోల్ (ABC) నిబంధనల ప్రకారం వీధి కుక్కల విషయంలో చర్యలు తీసుకోవాలని మాత్రమే చెప్పాం” అని జస్టిస్ విక్రమ్ నాథ్ నేతృత్వంలోని ధర్మాసనం స్పష్టం చేసింది. కుక్కల ప్రేమికులు దాఖలు చేసిన పిటిషన్లపై కోర్టు విచారణ చేపట్టింది.