పెళ్లి ఆచారాలలో భాగంగా ఆడుతున్న ఆటలో తాను ఓడిపోయానన్న ఆవేశంతో, నవవధువు తలపై వరుడు బలంగా కొట్టిన ఘటన ఉజ్బెకిస్థాన్‌లో చోటుచేసుకుంది. దీనికి సంబంధించిన వీడియో ప్రస్తుతం సోషల్ మీడియాలో వైరల్ అవుతూ తీవ్ర విమర్శలకు దారితీస్తోంది.
అసలేం జరిగింది? వైరల్ అవుతున్న ఈ వీడియోలో, పెళ్లి తర్వాత జరిగే ఒక సాంప్రదాయ వేడుక కనిపిస్తోంది. మన దేశంలో ‘ఉంగరాలు వెతికే ఆట’ లాగానే అక్కడ కూడా వరుడు, వధువు ఒక చిన్న పోటీలో పాల్గొంటారు. ఇందులో వధువు చాలా వేగంగా స్పందించి విజయం సాధిస్తుంది.
తన విజయాన్ని ఆనందంగా జరుపుకుంటూ వధువు చేతులు పైకి ఎత్తుతుంది. అయితే, తన ఓటమిని భరించలేని వరుడు, పెళ్లి వేదిక అని కూడా చూడకుండా పక్కనే ఉన్న వధువు తలపై బలంగా పిడిగుద్దు కురిపించాడు.
నివ్వెరపోయిన అతిథులు: హఠాత్తుగా జరిగిన ఈ దాడితో వధువు షాక్‌కు గురై నిశ్చేష్టురాలై నిలబడిపోయింది. ఆమెకు ఏమి జరిగిందో అర్థం కాక అలాగే ఉండిపోయింది. ఆ తర్వాత ఒక మహిళా బంధువు వచ్చి వధువును వేదికపై నుండి లోపలికి తీసుకెళ్లారు. ఇంతటి ఘోరానికి ఒడిగట్టినా వరుడు ఏమాత్రం పశ్చాత్తాపం లేకుండా, ఏమీ ఎరగనట్టు ప్రశాంతంగా వేదికపైనే నిలబడటం అక్కడి అతిథులను, వీడియో చూస్తున్న ప్రేక్షకులను మరింత దిగ్భ్రాంతికి గురిచేసింది.
నెటిజన్ల ఆగ్రహం: సోషల్ మీడియాలో ఈ వీడియో చూసిన వారు వరుడి ప్రవర్తనను తీవ్రంగా ఖండిస్తున్నారు. “అందరి ముందు బహిరంగంగానే ఇంత క్రూరంగా ప్రవర్తించే వ్యక్తి, రేపు గదిలో ఇంకెంత దారుణంగా ఉంటాడో? ఇప్పుడే ఈ పెళ్లిని రద్దు చేసుకోవడం వధువుకు శ్రేయస్కరం” అని నెటిజన్లు కామెంట్ చేస్తున్నారు. కేవలం ఆటను గౌరవ సమస్యగా మార్చుకుని హింసకు పాల్పడటం మానవత్వం లేని చర్య అని అందరూ మండిపడుతున్నారు.