ఢిల్లీ: ఒకవైపు అమెరికా వీసా నిబంధనలను కఠినతరం చేస్తోంది. దీనివల్ల భారతీయులు తీవ్ర ఇబ్బందులు ఎదుర్కొంటున్న తరుణంలో, జర్మనీ ఒక సంతోషకరమైన వార్తను అందించింది. ఈ నిర్ణయం వల్ల ఐరోపా దేశాలకు వెళ్లే భారతీయులకు ఉన్న ఒక పెద్ద సమస్య తొలగిపోనుంది.
ఇటీవల కాలంలో అమెరికా వీసా నిబంధనలను భారతీయుల పట్ల కఠినతరం చేస్తోంది. వీసా కోసం భారతీయులు సుదీర్ఘకాలం నిరీక్షించాల్సి వస్తోంది. ఇటీవలే వందలాది మంది హెచ్-1బి (H-1B) వీసా ఇంటర్వ్యూలు రద్దయ్యాయి. దీంతో భారతీయులు ప్రత్యామ్నాయాల వైపు చూస్తున్నారు.
ట్రాన్సిట్ వీసా అవసరం లేదు చాలా మంది భారతీయులు ఇప్పుడు ఐరోపా దేశాల వైపు మొగ్గు చూపుతున్నారు. ఈ క్రమంలో జర్మనీ ఒక కీలక ప్రకటన చేసింది. జర్మనీ మీదుగా ఇతర ఐరోపా దేశాలకు వెళ్లే భారతీయులకు ఇకపై ట్రాన్సిట్ వీసా (Transit Visa) అవసరం లేదని ప్రకటించింది.
ఇంతకుముందు, జర్మనీ విమానాశ్రయం ద్వారా ఇతర దేశాలకు వెళ్లాలన్నా, కేవలం కొన్ని గంటలు విమానాశ్రయంలో గడపాలన్నా విడిగా వీసా తీసుకోవాల్సి వచ్చేది. ఇది ప్రయాణికులకు పెద్ద ఇబ్బందిగా ఉండేది. ఇప్పుడు ఆ నిబంధనను తొలగించడంతో ఐరోపా ప్రయాణం మరింత సులభతరం కానుంది.
ద్వైపాక్షిక చర్చలు జర్మనీ ఛాన్సలర్ ఫ్రెడరిక్ మెర్జ్ (Friedrich Merz) భారత పర్యటనలో భాగంగా ప్రధాని మోదీతో చర్చలు జరిపారు. అనంతరం ఈ ప్రకటన వెలువడింది. ఈ నిర్ణయం పట్ల ప్రధాని మోదీ సంతోషం వ్యక్తం చేస్తూ ఛాన్సలర్‌కు కృతజ్ఞతలు తెలిపారు. ఈ చర్య వల్ల ఇరు దేశాల మధ్య ప్రజల సంబంధాలు మరింత బలోపేతం అవుతాయని ఉమ్మడి ప్రకటనలో పేర్కొన్నారు.
గమనించవలసిన విషయం ఈ మినహాయింపు కేవలం ట్రాన్సిట్ వీసాకు మాత్రమే వర్తిస్తుంది. అంటే జర్మనీ విమానాశ్రయం ద్వారా వేరే దేశానికి వెళ్లేవారికి మాత్రమే ఇది వర్తిస్తుంది. ఒకవేళ మీరు జర్మనీ దేశాన్ని సందర్శించాలనుకుంటే మాత్రం కచ్చితంగా షెంజెన్ వీసా (Schengen Visa) తీసుకోవాల్సి ఉంటుంది. ఈ షెంజెన్ వీసా ఉంటే జర్మనీతో పాటు 29 ఐరోపా దేశాల్లో 90 రోజుల పాటు పర్యటించవచ్చు.