మహారాష్ట్ర స్థానిక సంస్థల ఎన్నికల్లో బీజేపీ నేతృత్వంలోని ‘మహాయుతి’ కూటమి క్లీన్ స్వీప్ దిశగా దూసుకుపోతోంది. ముంబై, నవీ ముంబై, పుణె, నాసిక్ వంటి కీలక నగరాలతో పాటు మెజారిటీ మున్సిపల్ కార్పొరేషన్లను బీజేపీ కైవసం చేసుకునేలా కనిపిస్తోంది.
సాధారణంగా భారతదేశంలో ఎన్నికల విజయాలను ‘లడ్డూ’లతో సెలబ్రేట్ చేసుకుంటారు. కానీ ఈసారి సీన్ మారింది. సోషల్ మీడియా అంతా ఇప్పుడు ‘రసమలై’ స్వీటుతో నిండిపోయింది. దీని వెనుక ఒక రాజకీయ కారణం ఉంది.
రసమలైకి, ఎన్నికలకు సంబంధం ఏంటి?
ఈ ‘రసమలై’ ట్రెండ్ వెనుక మహారాష్ట్ర నవనిర్మాణ సేన (MNS) అధినేత రాజ్ థాకరే చేసిన ఒక వివాదాస్పద వ్యాఖ్య ఉంది. జనవరి 15 ఎన్నికలకు ముందు జరిగిన ఒక ర్యాలీలో, రాజ్ థాకరే బీజేపీ నేత కె. అన్నామలై పేరును ఎగతాళి చేస్తూ ఆయనను ‘రసమలై’ అని పిలిచారు.
- రాజ్ థాకరే వ్యాఖ్య: ముంబైలో మరాఠీ అస్తిత్వం గురించి మాట్లాడుతూ, బయటి వ్యక్తుల జోక్యాన్ని ఆయన విమర్శించారు. తమిళనాడు నుండి ఒక ‘రసమలై’ (అన్నామలైని ఉద్దేశించి) ముంబైకి వచ్చాడంటూ ఎద్దేవా చేశారు. అంతేకాకుండా “హటావో లుంగీ, బజావో పుంగీ” వంటి వివాదాస్పద నినాదాలు కూడా చేశారు.
- అన్నామలై కౌంటర్: ముంబైకి ‘ట్రిపుల్ ఇంజిన్’ ప్రభుత్వం (కేంద్రంలో మోదీ, రాష్ట్రంలో ఫడ్నవీస్, మున్సిపాలిటీలో బీజేపీ మేయర్) అవసరమని అన్నామలై వ్యాఖ్యానించిన తర్వాత ఈ గొడవ మొదలైంది. రాజ్ థాకరే వ్యాఖ్యలపై స్పందిస్తూ, “నన్ను బెదిరించడానికి రాజ్ థాకరే, ఆదిత్య థాకరే ఎవరు? నేను ఒక రైతు బిడ్డను. నన్ను తిట్టడానికే వారు మీటింగ్‌లు పెట్టుకుంటున్నారంటే నా ప్రాముఖ్యత ఏంటో అర్థమవుతోంది” అని అన్నామలై ఘాటుగా సమాధానమిచ్చారు.
బీజేపీ విజయోత్సవం:
ఇప్పుడు ఎన్నికల ఫలితాల్లో బీజేపీ భారీ విజయం సాధించడంతో, కార్యకర్తలు రసమలై తింటూ, ఆ ఫోటోలను సోషల్ మీడియాలో షేర్ చేస్తున్నారు. మరికొందరు ఉత్సాహవంతులైన కార్యకర్తలు ఏకంగా శివసేన (UBT) మరియు ఎంఎన్ఎస్ (MNS) కార్యాలయాలకు రసమలై బాక్సులను పంపిస్తున్నారు.
- తేజస్వి సూర్య ట్వీట్: బీజేపీ ఎంపీ తేజస్వి సూర్య బీఎంసీ ఎన్నికల విజయాన్ని “స్వీట్ రసమలై విక్టరీ” అని అభివర్ణించారు.
ఎన్నికల గణాంకాలు:
- మొత్తం 29 మున్సిపల్ కార్పొరేషన్లలోని 2,869 సీట్లలో మహాయుతి కూటమి (బీజేపీ, షిండే శివసేన, అజిత్ పవార్ ఎన్సీపీ) సుమారు 1,700 వార్డుల్లో ఆధిక్యంలో ఉంది.
- ముంబై (BMC) లోని 227 వార్డుల్లో బీజేపీ-శివసేన కూటమి 165 సీట్లలో ఆధిక్యంలో ఉండి మేజిక్ ఫిగర్ (114) దాటేసింది. దీనితో బీఎంసీపై గత 30 ఏళ్లుగా ఉన్న శివసేన (UBT) పట్టు సడలిపోయింది.
- మరోవైపు, మొత్తం రాష్ట్రంలో ఎంఎన్ఎస్ కేవలం 13 వార్డుల్లో మాత్రమే గెలిచేలా ఉంది.
జలేబీ తర్వాత ఇప్పుడు రసమలై:
రాజకీయాల్లో స్వీట్ల ట్రెండ్ రావడం ఇదే మొదటిసారి కాదు. 2024 హర్యానా ఎన్నికల సమయంలో ‘జలేబీ’ వార్తల్లో నిలిచింది. రాహుల్ గాంధీ జలేబీ గురించి చేసిన వ్యాఖ్యల నేపథ్యంలో, కాంగ్రెస్ ఓటమి తర్వాత బీజేపీ ‘జలేబీ’లతో సంబరాలు చేసుకుంది. ఇప్పుడు మహారాష్ట్రలో ‘రసమలై’ వంతొచ్చింది.