గతంలో సోషల్ మీడియాలో ‘సోనమ్ బేవఫా హై’ (సోనమ్ నమ్మకద్రోహి) అనే మీమ్ బాగా వైరల్ అయ్యింది. ఇప్పుడు సోనమ్ యాదవ్ అనే మహిళ నిజంగానే తన భర్తకు తీరని ద్రోహం చేసింది.
ఝాన్సీకి చెందిన పుష్పేంద్ర యాదవ్‌కు, సోనమ్ యాదవ్‌కు 2023 డిసెంబర్‌లో వివాహం జరిగింది. అయితే పెళ్లయినప్పటి నుండి వీరిద్దరి మధ్య సఖ్యత లేదు. ఈ రెండేళ్లలో సోనమ్ తన అత్తగారి ఇంట్లో ఆరు నెలలు కూడా ఉండలేదు. ఎక్కువ కాలం మధ్యప్రదేశ్‌లోని దతియా జిల్లాలో ఉన్న తన పుట్టింట్లోనే గడిపేది.
“నువ్వు నాకు నచ్చవు.. నాకు బాయ్‌ఫ్రెండ్ ఉన్నాడు” తన భార్య తనతో ఎందుకు సరిగ్గా ఉండటం లేదని పుష్పేంద్ర ఒకరోజు నిలదీశాడు. దానికి సోనమ్ నిర్మొహమాటంగా.. “నువ్వు నాకు నచ్చవు, నాకు పుట్టింటి దగ్గర ఒక బాయ్‌ఫ్రెండ్ ఉన్నాడు” అని చెప్పి షాక్ ఇచ్చింది. అంతేకాకుండా, ఈ విషయం ఎవరికైనా చెబితే ‘వరకట్న వేధింపుల కేసు’ పెట్టి జైలుకు పంపిస్తానని బెదిరించింది. దీంతో పుష్పేంద్ర భయపడి మిన్నకుండిపోయాడు.
డబ్బు కోసం పక్కా ప్లాన్: ఇటీవల పుష్పేంద్రకు తన భూమికి సంబంధించిన ప్రభుత్వ పరిహారం (Compensation) అందింది. ఆ డబ్బుతో అతను కొన్ని బంగారు నగలు చేయించి, మిగిలిన నగదును ఇంట్లో పెట్టాడు. ఈ విషయం తెలిసిన సోనమ్, పద్ధతి మార్చుకున్నట్లు నటిస్తూ.. “నేను అత్తగారింటికి వస్తాను, నన్ను తీసుకెళ్లండి” అని పుష్పేంద్రకు ఫోన్ చేసింది. భార్య మారిపోయిందని నమ్మిన పుష్పేంద్ర, సంతోషంగా ఆమెను ఇంటికి తీసుకొచ్చాడు.
అసలు రంగు బయటపడింది: నవంబర్ 13-14 తేదీల మధ్య రాత్రి సోనమ్ అకస్మాత్తుగా అదృశ్యమైంది. ఇంట్లో వెతకగా రూ. 3.50 లక్షల నగదు మరియు లక్షల విలువైన బంగారు, వెండి నగలు మాయమయ్యాయి. పక్కింటి సిసిటివి (CCTV) ఫుటేజీని పరిశీలించగా, అర్ధరాత్రి ఒక స్కార్పియో కారు వచ్చి వెళ్లినట్లు తేలింది. అది ఆమె బాయ్‌ఫ్రెండ్ అభిషేక్ కారు అని పుష్పేంద్ర ఆరోపిస్తున్నాడు.
ప్రస్తుతం సోనమ్ తన ప్రియుడితో కలిసి పరారైందని, తనకు న్యాయం చేయాలని పుష్పేంద్ర పోలీసులను వేడుకుంటున్నాడు. అయితే, పోలీసులు ఇంకా ఫిర్యాదు అందలేదని చెబుతుండగా, పుష్పేంద్ర మాత్రం అధికారుల చుట్టూ తిరుగుతున్నాడు.