అంతర్జాతీయ మార్కెట్‌లో వరుసగా చోటుచేసుకుంటున్న పరిణామాలు ఇన్వెస్టర్లలో తీవ్ర ఆందోళన కలిగిస్తున్నాయి. గ్రీన్‌లాండ్ దేశాన్ని చేజిక్కించుకోవాలనే ప్రయత్నంలో అమెరికా అధ్యక్షుడు డొనాల్డ్ ట్రంప్ వరుసగా సంచలన ప్రకటనలు చేస్తున్నారు.
ట్రంప్ చర్యల వల్ల స్టాక్ మార్కెట్లు ప్రభావితం కావడంతో, పెట్టుబడిదారులు తమ డబ్బును భద్రపరుచుకోవడానికి బంగారం, వెండి, ప్లాటినం వంటి లోహాలపై పెట్టుబడి పెట్టడం ప్రారంభించారు. దీనివల్ల సోమవారం ఉదయం వెండి ధరలు అమాంతం పెరిగి షాక్ ఇచ్చాయి. ప్రస్తుతం మార్కెట్‌లో బంగారం కంటే వెండికే డిమాండ్ ఎక్కువగా ఉండటంతో వెండి ధర చరిత్రలో ఎన్నడూ లేని గరిష్ట స్థాయికి చేరింది.
చరిత్ర సృష్టించిన వెండి ధర: సోమవారం రీటైల్ మార్కెట్‌లో ఒక కిలో వెండి ధర ఏకంగా రూ. 8,000 పెరిగి రూ. 3,18,000 మార్కును తాకింది. ఇది ఆల్-టైమ్ రికార్డ్. అలాగే మల్టీ కమోడిటీ ఎక్స్ఛేంజ్ (MCX)లో కూడా కిలో వెండి మొదటిసారి రూ. 3 లక్షల మార్కును దాటి రూ. 3,01,315 వద్ద ట్రేడ్ అయ్యింది.
ధరల పెరుగుదలకు కారణాలు: అమెరికా అధ్యక్షుడు ట్రంప్ ఐరోపా దేశాలపై కొత్త వాణిజ్య పన్నులు (Trade Taxes) విధిస్తామని ప్రకటించడం ఐరోపా మార్కెట్లను దెబ్బతీసింది. గ్రీన్‌లాండ్ అంశంలో అమెరికాను వ్యతిరేకిస్తున్న దేశాలపై ఫిబ్రవరి 1 నుండి 10 శాతం పన్ను విధిస్తామని, జూన్ నాటికి అది 25 శాతానికి పెరుగుతుందని ట్రంప్ హెచ్చరించారు. దీనికి ప్రతిగా ఐరోపా దేశాలు కూడా అమెరికాతో వాణిజ్య ఒప్పందాలను రద్దు చేసుకుంటామని, తమ సైనిక బలగాలను మోహరిస్తామని హెచ్చరించడంతో అంతర్జాతీయంగా ‘ట్రేడ్ వార్’ (వాణిజ్య యుద్ధం) భయం మొదలైంది.
బంగారం ధర: వెండితో పాటు బంగారం ధరలు కూడా భారీగా పెరిగాయి. అంతర్జాతీయ మార్కెట్‌లో స్పాట్ గోల్డ్ 1.6 శాతం పెరిగి ఔన్సుకు 4,691 డాలర్ల వరకు వెళ్లింది.
- చెన్నై/హైదరాబాద్ మార్కెట్‌లో: 10 గ్రాముల 24 క్యారెట్ల బంగారం ధర రూ. 1,860 పెరిగి రూ. 1,46,730 కి చేరింది.
- 22 క్యారెట్ల బంగారం ధర రూ. 1,700 పెరిగి రూ. 1,34,500 కు చేరింది.