సాధారణంగా ప్రజలు కుక్కలు, పిల్లుల వంటి జంతువులను పెంపుడు జంతువులుగా పెంచుకోవడం, వాటికి స్నానం చేయించి ముస్తాబు చేయడం మనం చూస్తుంటాం. కానీ ఇక్కడ ఒక మహిళ తాను పెంచుకుంటున్న ఎలుకలను తన బిడ్డలలా భావించి, షాంపూ వేసి రుద్ది స్నానం చేయిస్తున్న వీడియో నెట్టింట వైరల్ అవుతూ అందరినీ నవ్విస్తోంది.
వీడియోలో ఏముంది? సోషల్ మీడియాలో హల్చల్ చేస్తున్న ఈ వింత వీడియోలో, ఒక మహిళ తన ఇంటి మిద్దె (టెర్రస్) మీద కూర్చుని, బకెట్‌లో నీళ్లు పెట్టుకుని ఎలుకలకు స్నానం చేయిస్తోంది. ఒక తల్లి తన బిడ్డను ఎంత అపురూపంగా స్నానం చేయిస్తుందో, అదే శైలిలో ఆమె ఒక పెద్ద ఎలుకను చేతిలోకి తీసుకుని, మొదట నీళ్లతో తడిపి ఆపై షాంపూను ఒళ్లంతా రాసి రుద్దుతోంది.
ఒళ్ళంతా షాంపూ నురగతో ఉన్న ఆ ఎలుక ఆమె నుండి తప్పించుకుని పారిపోవడానికి ప్రయత్నించినా, ఆమె మాత్రం వదలకుండా పట్టుకుని మరీ స్నానం చేయిస్తోంది. “ఈరోజు ఎలాగైనా ఈ ఎలుకను తళతళా మెరిసేలా చేయాలి” అనే పట్టుదలతో ఆమె చేస్తున్న పని నెటిజన్లను కడుపుబ్బ నవ్విస్తోంది.
ఇన్‌స్టాగ్రామ్‌లో షేర్ చేసిన ఈ వీడియో కొన్ని రోజుల్లోనే వేలమందిని ఆకట్టుకుని, లైకుల వర్షం కురిపిస్తోంది. ఇది చూసిన నెటిజన్లు “పాపం ఎలుకకు ఎంత కష్టం వచ్చింది!” అని, “ఇంతటి కేరింగ్ ఉన్న ఓనర్లను ఎక్కడా చూడలేదు” అని సరదాగా కామెంట్లు పెడుతున్నారు.