తమిళ వెట్రి కజగం (TVK) అధ్యక్షుడు విజయ్ గత కొన్ని రోజులుగా తీవ్రమైన మౌనంలో ఉన్నారు. ఆయన మౌనానికి ఒక ప్రైవేట్ సర్వే ఫలితాలే కారణమని ఆయనకు సన్నిహితంగా ఉన్నవారు చెబుతున్నారు.
గత మూడు వారాలుగా టీవీకే పార్టీ కార్యకలాపాలు దాదాపు నిలిచిపోయాయి. కంప్యూటర్‌లో ‘Sleep Mode’ నొక్కినట్లుగా పార్టీ మొత్తం సైలెంట్ అయిపోయింది. పార్టీ సీనియర్ నాయకులు గానీ, కొత్తగా చేరిన నాంజిల్ సంపత్ వంటి వారు గానీ పార్టీ తరపున ఎలాంటి ప్రకటనలు చేయడం లేదు. చివరికి ఘనంగా నిర్వహించాలనుకున్న సంక్రాంతి (పొంగల్) వేడుకలను కూడా చివరి నిమిషంలో రద్దు చేశారు.
అసలు కారణం ఏమిటి? విజయ్ మౌనానికి ఆయన చేయించుకున్న ఒక రహస్య సర్వే ఫలితాలే కారణమని సమాచారం. ఆ సర్వేలో వెల్లడైన ముఖ్యాంశాలు ఇవే:
- ఒక ప్రైవేట్ సంస్థ ద్వారా జిల్లా వారీగా శాంపిల్స్ సేకరించి ఈ సర్వే నిర్వహించారు.
- ఈ సర్వే ప్రకారం, విజయ్ పార్టీకి ప్రస్తుతం 10 శాతం ఓట్ల షేర్ కూడా వచ్చే అవకాశం లేదని తేలింది.
- ఉత్తర తమిళనాడులో కొంత మద్దతు ఉన్నా, మిగిలిన ప్రాంతాల్లో పార్టీ పరిస్థితి ఆశాజనకంగా లేదు.
- మహిళల మద్దతు ఉన్నప్పటికీ, అది ఎన్నికల్లో గెలిపించే స్థాయిలో లేదు.
- ఇప్పటికీ అన్నాడీఎంకే (AIADMK) కంటే కిందనే టీవీకే పార్టీ ఉందని సర్వే స్పష్టం చేసింది.
- ఈ ఫలితాలు చూసి విజయ్ తీవ్ర అసంతృప్తికి లోనయ్యారని, “మీరు చెప్పింది ఏదీ జరగట్లేదే!” అంటూ పార్టీలోని ఒక కీలక నేతపై ఆగ్రహం వ్యక్తం చేశారని సమాచారం.
డీఎంకే సర్వే ఏమంటోంది? అధికార పార్టీ డీఎంకే చేయించుకున్న ఒక అనధికారిక సర్వే ప్రకారం కూడా విజయ్ పార్టీకి పట్టణాల్లో ఉన్నంత ఆదరణ గ్రామీణ ప్రాంతాల్లో లేదని తేలింది. నగరాల్లో యువత, కొత్త ఓటర్ల వల్ల పార్టీకి 10 శాతం మద్దతు కనిపిస్తున్నా, గ్రామాల్లో అది 10 శాతం కంటే తక్కువగానే ఉంది. తమిళనాడులో ఎన్నికల ఫలితాలను ప్రభావితం చేసేది గ్రామీణ ఓటర్లే కాబట్టి, ఇది విజయ్‌కు పెద్ద సవాలుగా మారింది.