నేటి కాలంలో ఇళ్లు, దుకాణాలకు ఎన్ని సీసీటీవీ కెమెరాలు పెట్టినా, ఎన్ని తాళాలు వేసినా దొంగతనాలు జరుగుతూనే ఉన్నాయి. కానీ, మన దేశంలో యజమానులే లేని దుకాణాలు, అస్సలు దొంగతనం అనేదే జరగని ఒక గ్రామం ఉందంటే మీరు నమ్ముతారా? అవును, ఆ గ్రామం ఎక్కడ ఉంది? దాని ప్రత్యేకత ఏంటో ఇప్పుడు చూద్దాం.
నిజాయితీకి మారుపేరు – ఖోనోమా: నాగాలాండ్‌లోని ‘ఖోనోమా’ (Khonoma) గ్రామం కేవలం ప్రకృతి అందాలకే కాదు, అక్కడి ప్రజల నిజాయితీకి కూడా ప్రసిద్ధి. ఇక్కడ దుకాణాల్లో వస్తువులు ఉంటాయి కానీ, అమ్మే మనుషులు ఉండరు. కస్టమర్లు తమకు కావాల్సిన వస్తువులను తీసుకుని, అక్కడ రాసి ఉన్న ధర ప్రకారం డబ్బులను ఒక పెట్టెలో వేసి వెళ్తారు. సుమారు 1900 జనాభా ఉన్న ఈ గ్రామం ప్రపంచానికే ఒక రోల్ మోడల్‌గా నిలుస్తోంది. ఇక్కడ అంగామీ తెగకు చెందిన ప్రజలు నివసిస్తున్నారు.
తాళం లేని ఇళ్లు: ఈ గ్రామానికి వచ్చే పర్యాటకులు ఇక్కడి వింత పద్ధతులను చూసి ఆశ్చర్యపోతుంటారు. ఇక్కడ దుకాణాలు మాత్రమే కాదు, ప్రజలు తమ ఇళ్లకు కూడా తాళాలు వేయరు. ఎవరూ ఏ వస్తువును దొంగిలించరనే నమ్మకం ఇక్కడ బలంగా ఉంది.
భారతదేశపు మొదటి ‘గ్రీన్ విలేజ్’: ఖోనోమా గ్రామానికి మరో గొప్ప గుర్తింపు కూడా ఉంది. ఇది భారతదేశపు మొట్టమొదటి ‘గ్రీన్ విలేజ్’ (Green Village). 1998లో ఇక్కడ వేటను పూర్తిగా నిషేధించారు. పర్యావరణాన్ని రక్షించేందుకు అంగామీ తెగ ప్రజలు వేటను మానేసి, వ్యవసాయం మరియు పశుపోషణపై ఆధారపడుతున్నారు. ఇక్కడి నీటి పునర్వినియోగ (Water Recycling) వ్యవస్థను నాసా (NASA) శాస్త్రవేత్తలు సైతం ప్రశంసించారు.
కాలుష్యం, ట్రాఫిక్ మరియు దొంగతనాల భయంతో జీవించే నగరవాసులకు, ప్రకృతి ఒడిలో ప్రశాంతంగా, నిజాయితీగా జీవిస్తున్న ఖోనోమా ప్రజలు ఒక గొప్ప పాఠం చెబుతున్నారు. 19వ శతాబ్దంలో బ్రిటీషర్లకు వ్యతిరేకంగా పోరాడిన చరిత్ర కలిగిన ఈ గ్రామం, ఇప్పుడు ప్రకృతి సంరక్షణలో మరో విజయాన్ని అందుకుంది.