సోషల్ మీడియాలో వైరల్ అవుతున్న కొన్ని వీడియోలు ప్రపంచవ్యాప్తంగా ఆశ్చర్యాన్ని కలిగిస్తున్నాయి. వీటిని చూసిన నెటిజన్లు చైనా ఇప్పటికే “2080వ సంవత్సరంలో జీవిస్తోంది” అని కామెంట్స్ చేస్తున్నారు. ఈ వీడియోలలో వ్యక్తులు కార్ల దగ్గరకు వెళ్లగానే తలుపులు వాటంతట అవే తెరుచుకోవడం, లైట్లు వెలగడం మరియు కొన్ని సందర్భాల్లో కార్లు తమ యజమానుల వద్దకు అవే డ్రైవ్ చేసుకుంటూ రావడం కనిపిస్తోంది.
యజమానులకు ‘స్వాగతం’ పలికే కార్లు: చైనా వీధుల్లో పార్క్ చేసి ఉన్న ఎస్‌యూవీ (SUV) మరియు సెడాన్ కార్ల దగ్గరకు యజమానులు వెళ్లగానే, ఎటువంటి హ్యాండిల్స్ ముట్టుకోకుండానే అవి అన్-లాక్ అవుతున్నాయి. కేవలం చేతి సైగలతో (Gestures) లేదా కారు దగ్గర నిలబడగానే డోర్లు ఓపెన్ అవుతున్నాయి. కొన్ని కార్లు యజమానులు లోపలికి ఎక్కడానికి వీలుగా తమ ఎత్తును (Air Suspension ద్వారా) తగ్గించుకుంటున్నాయి. యజమాని సామాను పట్టుకుని కారు వెనుకకు రాగానే డిక్కీ (Boot lid) ఆటోమేటిక్ గా తెరుచుకుంటోంది.
ఇవి కాన్సెప్ట్ కార్లు కావు! అందరినీ ఆశ్చర్యపరిచే విషయం ఏమిటంటే.. ఇవి ప్రయోగాత్మక కార్లు (Prototypes) కావు. చైనా మార్కెట్లో ఇప్పటికే సామాన్య ప్రజలు వాడుతున్న ఎలక్ట్రిక్ వాహనాలు (EVs). వీటిలో ముఖ్యంగా Li Auto, NIO, AITO (Seres) M9, మరియు Zeekr వంటి కంపెనీల కార్లు ఈ వీడియోలలో కనిపిస్తున్నాయి.
ఈ సాంకేతికత వెనుక ఉన్న రహస్యం: ఈ ‘2080’ అనుభవం వెనుక అధునాతన సెన్సార్లు, కెమెరాలు, రాడార్లు మరియు ఆర్టిఫిషియల్ ఇంటెలిజెన్స్ (AI) ఉన్నాయి. వీటిలో ఉండే ‘రిమోట్ సమ్మన్’ (Remote Summon) ఫీచర్ ద్వారా పార్కింగ్ ప్లేస్ నుండి కారును యజమాని ఉన్న చోటుకి పిలిపించుకోవచ్చు. ప్రపంచంలోని ఇతర దేశాలు ఇంకా ఈ టెక్నాలజీపై నియంత్రణలు విధిస్తుంటే, చైనాలో మాత్రం ఇది సర్వసాధారణంగా మారిపోయింది.