అమెరికా అధ్యక్షుడు డొనాల్డ్ ట్రంప్ గ్రీన్లాండ్‌పై చేస్తున్న వ్యాఖ్యల పట్ల యూరోపియన్ పార్లమెంటుకు చెందిన డెన్మార్క్ సభ్యుడు అత్యంత కఠినంగా స్పందించారు. గ్రీన్లాండ్‌ను అమెరికా స్వాధీనం చేసుకోవాలన్న ట్రంప్ వాదనను తోసిపుచ్చుతూ, డెన్మార్క్ ఎంపీ ఆండర్స్ విస్టిసెన్ ఆయనపై తీవ్ర ఆగ్రహం వ్యక్తం చేశారు.
యూరోపియన్ పార్లమెంటు సమావేశంలో విస్టిసెన్ మాట్లాడుతూ.. “మిస్టర్ ప్రెసిడెంట్, మీకు అర్థమయ్యే మాటల్లోనే చెబుతాను.. ఫ ఆఫ్ (Fuck off)”** అంటూ అసభ్య పదజాలంతో తిట్టిపోశారు.
వివాదం ఏమిటి? జాతీయ భద్రత దృష్ట్యా మరియు రష్యా, చైనా ప్రభావాలను అడ్డుకోవడానికి ఆర్కిటిక్ ద్వీపమైన గ్రీన్లాండ్ అమెరికా నియంత్రణలో ఉండాలని ట్రంప్ ఇటీవల మళ్ళీ వాదించారు. ఇందుకోసం యూరప్ దేశాలపై ఆర్థిక ఒత్తిడి తీసుకురావాలని కూడా ఆయన సూచించారు. అయితే గ్రీన్లాండ్ అనేది డెన్మార్క్ రాజ్యంలో స్వయంప్రతిపత్తి కలిగిన భూభాగమని, అది అమ్మకానికి లేదని డెన్మార్క్ మరియు గ్రీన్లాండ్ నేతలు ఇప్పటికే స్పష్టం చేశారు.
ట్రంప్ సోషల్ మీడియా పోస్ట్‌లు: ఈ వివాదం మధ్య, డొనాల్డ్ ట్రంప్ తన ‘ట్రూత్ సోషల్’ ఖాతాలో ఏఐ (AI) ద్వారా రూపొందించిన కొన్ని ఫోటోలను పంచుకున్నారు. అందులో అమెరికా మ్యాప్‌లో కెనడా, వెనిజులా మరియు గ్రీన్లాండ్‌లను కలిపేసినట్లు చూపించారు. మరో ఫోటోలో ట్రంప్, ఉపాధ్యక్షుడు జెడి వాన్స్ మరియు సెక్రటరీ ఆఫ్ స్టేట్ మార్కో రూబియో కలిసి గ్రీన్లాండ్‌పై అమెరికా జెండాను పాతడం, దానిని ‘అమెరికా భూభాగం’ (US Territory) అని పిలవడం చర్చనీయాంశంగా మారింది.