చలికాలం అయినా, వేసవికాలం అయినా ఎలక్ట్రిక్ కెటిల్ వినియోగం ఇళ్లలో సర్వసాధారణం అయిపోయింది. నీళ్లు వేడి చేయడమే కాకుండా టీ, కాఫీలు, చివరికి నూడుల్స్ వండటానికి కూడా దీనిని ఉపయోగిస్తున్నారు. ఇది కిచెన్ పనిని సులభతరం చేసినప్పటికీ, సరైన జాగ్రత్తలు తీసుకోకపోతే ప్రమాదాలు జరిగే అవకాశం ఉంది. ఎలక్ట్రిక్ కెటిల్ వాడేటప్పుడు గుర్తుంచుకోవాల్సిన 4 ముఖ్యమైన చిట్కాలు ఇక్కడ ఉన్నాయి:
- ఏ కెటిల్ సురక్షితమైనది?
మీరు కొత్త కెటిల్ కొనాలనుకుంటే, స్టెయిన్‌లెస్ స్టీల్ కెటిల్‌ను ఎంచుకోవడం ఉత్తమం. ప్లాస్టిక్ కెటిల్స్‌తో పోలిస్తే ఇవి ఎక్కువ కాలం మన్నుతాయి మరియు ఆరోగ్యానికి కూడా మంచివి. ప్లాస్టిక్ కెటిల్‌లో నీళ్లు బాగా మరిగించినప్పుడు రసాయనాలు విడుదలయ్యే ప్రమాదం ఉంది, కానీ స్టీల్ కెటిల్‌లో అటువంటి ఇబ్బంది ఉండదు. - నీళ్లు పోయకముందే ఆన్ చేయవద్దు
చాలామంది చేసే అతిపెద్ద తప్పు ఏమిటంటే.. కెటిల్‌లో నీళ్లు లేదా పాలు పోయకముందే స్విచ్ ఆన్ చేయడం. ఇలా చేయడం వల్ల లోపల ఉండే హీటింగ్ ఎలిమెంట్ దెబ్బతిని, షార్ట్ సర్క్యూట్ అయ్యే ప్రమాదం ఉంది. కాబట్టి, ఎప్పుడూ ముందుగా నీళ్లు పోసిన తర్వాతే పవర్ ఆన్ చేయాలి. - నీళ్లు ఎంత వరకు నింపాలి?
కెటిల్‌ను ఎప్పుడూ దాని పైభాగం (అంచు) వరకు నింపకూడదు. నీరు మరిగేటప్పుడు పొంగి బయటకు పడే అవకాశం ఉంది. దీనివల్ల వైర్లకు నీరు తగిలి షార్ట్ సర్క్యూట్ కావచ్చు. అందుకే కెటిల్ అంచు కంటే కనీసం 2 నుండి 3 ఇంచీల తక్కువగానే నీటిని నింపాలి. - శుభ్రం చేయడం ఎలా?
రోజూ వాడే కెటిల్‌లో తెల్లటి పొరలాంటి పాచి (Limescale) చేరుతుంటుంది. దీనిని శుభ్రం చేయడానికి ఒక కప్పు నీటిలో కొంచెం వెనిగర్ కలిపి కెటిల్‌లో పోయండి. తర్వాత 10 నిమిషాల పాటు ఆ నీటిని మరిగించి పారబోయండి. చివరగా లోపల పొడి గుడ్డతో తుడిస్తే కెటిల్ కొత్తదానిలా మెరుస్తుంది.