మనం ప్రతిరోజూ ఇల్లు ఊడుస్తాం, తుడుస్తాం.. నేల మెరుస్తూనే ఉంటుంది. కానీ, కొన్నిసార్లు ఇంట్లో తెలియని దుర్వాసన రావడం లేదా ఇంట్లోని వారు పదే పదే అనారోగ్యానికి గురవ్వడం జరుగుతుంది. దీనికి కారణం మనం కంటికి కనిపించే చోట మాత్రమే శుభ్రం చేసి, బ్యాక్టీరియా ఎక్కువగా ఉండే కొన్ని వస్తువులను పట్టించుకోకపోవడమే. మనం రోజూ తాకే, కానీ శుభ్రం చేయడం మర్చిపోయే ఆ 8 వస్తువులు ఇవే:
- మొబైల్ ఫోన్లు మరియు రిమోట్లు: రోజంతా ఇవి మన చేతుల్లోనే ఉంటాయి. బయట నుండి రాగానే, భోజనం చేసేటప్పుడు చేతులు కడుక్కోకుండానే వీటిని వాడుతుంటాం. కాబట్టి రోజుకు ఒకసారి మైక్రోఫైబర్ క్లాత్‌తో వీటిని తుడవాలి.
- కిచెన్ సింక్ మరియు టాప్ హ్యాండిల్స్: సింక్ ఎప్పుడూ నీళ్లతో కడుగుతూనే ఉంటాం కదా అని చాలామంది శుభ్రం చేయరు. కానీ, కూరగాయలు, అంటు గిన్నెలు, ఆహారపు ముక్కల వల్ల ఇక్కడే బ్యాక్టీరియా ఎక్కువగా పెరుగుతుంది. ప్రతిరోజూ వేడి నీరు, డిసిన్ఫెక్టెంట్‌తో వీటిని కడగాలి.
- చాపింగ్ బోర్డ్ (కూరగాయలు కోసే పీట): చెక్క లేదా ప్లాస్టిక్ బోర్డులపై కోసేటప్పుడు చిన్న చిన్న గీతలు పడతాయి. వాటిలో ఆహార కణాలు ఇరుక్కుపోయి బ్యాక్టీరియా చేరుతుంది. వాడిన ప్రతిసారీ వేడి నీళ్లతో కడగాలి.
- వంటగది స్పాంజ్ మరియు గిన్నెలు తుడిచే గుడ్డ: ఇవి ఎప్పుడూ తడిగానే ఉంటాయి కాబట్టి త్వరగా వాసన వస్తాయి. స్పాంజ్‌ను వేడి నీళ్లలో ఉడకబెట్టడం లేదా వారానికోసారి మార్చడం మంచిది.
- లైట్ స్విచ్‌లు: ఇంట్లో ప్రతి ఒక్కరూ స్విచ్‌లను తాకుతారు. కానీ వీటిని తుడవడం అందరూ మర్చిపోతారు. రోజుకు ఒక్కసారి వీటిని తుడవడం వల్ల వైరస్‌లు వ్యాపించకుండా ఉంటాయి.
- బాత్‌రూమ్ నల్లాలు మరియు హ్యాండిల్స్: బాత్‌రూమ్‌లో తేమ ఎక్కువ కాబట్టి ఇక్కడ క్రిములు వేగంగా పెరుగుతాయి. రోజుకు ఒకసారి డిసిన్ఫెక్టెంట్ వైప్స్‌తో వీటిని శుభ్రం చేయాలి.
- టాయిలెట్ ఫ్లష్ మరియు తలుపు గొళ్ళెం: చేతులు కడుక్కోవడానికి ముందే మనం ఫ్లష్‌ను తాకుతాం. కాబట్టి ఇక్కడ కీటకాలు ఎక్కువగా ఉంటాయి. దీనిని రోజువారీ క్లీనింగ్ లిస్టులో చేర్చుకోవాలి.
- పెంపుడు జంతువుల ఆహార పాత్రలు: కుక్కలు లేదా పిల్లులు ఉంటే వాటి గిన్నెలను ప్రతిరోజూ వేడి నీరు, సబ్బుతో కడగాలి. లేదంటే వాటి ద్వారా ఇంట్లో అందరికీ ఇన్ఫెక్షన్లు సోకే ప్రమాదం ఉంది.