లక్నో: ఉత్తరప్రదేశ్ రాజధాని లక్నోలో సంబంధాల్లో మోసం, కుట్ర మరియు చట్టాన్ని దుర్వినియోగం చేసిన ఒక వింత ఉదంతం వెలుగులోకి వచ్చింది. అమీనాబాద్ నివాసి వాసిఫ్ భార్య అమీనా ఖాతూన్‌కు, భోపాల్‌కు చెందిన ఆమాన్ అనే యువకుడితో గత కొంతకాలంగా ప్రేమ వ్యవహారం నడుస్తోంది.
వీరిద్దరూ 2022లో ఇన్‌స్టాగ్రామ్ ద్వారా పరిచయమయ్యారు. అమీనా AMU నుండి గ్రాడ్యుయేషన్ పూర్తి చేయగా, ఆమాన్ భోపాల్‌లో బీటెక్ చదివాడు. అమీనా భర్త వాసిఫ్ కూడా బీటెక్ గ్రాడ్యుయేట్, కానీ అతను అమీనాబాద్‌లో తన కుటుంబానికి చెందిన 80 ఏళ్ల నాటి డైరీ-స్టేషనరీ వ్యాపారాన్ని చూసుకుంటున్నాడు. అయితే అమీనా మరియు ఆమె ప్రియుడి బంధానికి భర్త వాసిఫ్ అడ్డుగా మారాడని వారు భావించారు.
ఈ అడ్డంకిని తొలగించడానికి అమీనా, ఆమె ప్రియుడు ఆమాన్ కలిసి ఒక ప్లాన్ వేశారు. రెండు నెలల క్రితం వాసిఫ్ (అమీనా భర్త) థార్ కారులో గోమాంసం దొరికింది. బజరంగ్ దళ్ సభ్యులు పోలీసులకు సమాచారం ఇవ్వడంతో వాసిఫ్ అరెస్టయి నెల రోజుల పాటు జైలులో ఉన్నాడు. కానీ తాజాగా దర్యాప్తులో తేలిన నిజం అందరినీ షాక్‌కు గురిచేసింది. అమీనా స్వయంగా తన భర్త కారు తాళాలను ప్రియుడికి ఇచ్చిందని, అతనే ఆ కారులో గోమాంసం ఉంచాడని తేలింది.
రెండో కుట్ర: లోడర్‌లో గోమాంసం
వీరిద్దరూ అంతటితో ఆగకుండా జనవరి 14న మరో కుట్రకు తెరలేపారు. కాకోరిలో ఒక లోడర్ వాహనంలో గోమాంసం దొరకడం కలకలం రేపింది. ఈ లోడర్‌ను ‘పోర్టర్ యాప్’ ద్వారా బుక్ చేయడంతో డ్రైవర్‌ను వదిలేశారు. విచారణలో ఆ లోడర్ వాసిఫ్ మొబైల్ నంబర్ నుండి బుక్ అయినట్లు తేలింది. కానీ అసలు విషయం ఏమిటంటే.. భర్తకు తెలియకుండా అమీనా ఆ బుకింగ్ చేసింది. అందులోని పెట్టెల్లో భోపాల్ నుండి తెచ్చిన 12 కిలోల గోమాంసాన్ని ప్రియుడు ఆమాన్ ఉంచాడు.
‘రాహుల్’గా మారి బజరంగ్ దళ్‌లోకి ప్రియుడు
ఈ మొత్తం ఉదంతంలో అత్యంత విస్తుపోయే విషయం ఏమిటంటే.. ఆమాన్ తన గుర్తింపును మార్చుకుని ‘రాహుల్’ పేరుతో బజరంగ్ దళ్ బృందంలో చేరాడు. రూ. 2,000 చెల్లించి సభ్యత్వం తీసుకున్నాడు. రాహుల్ పేరుతోనే అతను తన భర్త కారు (థార్) మరియు లోడర్ గురించి బజరంగ్ దళ్ సభ్యులకు సమాచారం ఇచ్చాడు. ఒక ఫేక్ ఐడీ (రామేశ్వర్ పేరుతో) పై తీసుకున్న సిమ్ కార్డుతో డ్రైవర్‌తో మాట్లాడాడు.
పోలీసుల చర్య
ఈ కుట్ర బయటపడటంతో పోలీసులు అమీనాను పట్టుకోవడానికి హైకోర్టు ప్రాంగణానికి చేరుకున్నారు. అయితే ఆమెను అరెస్ట్ చేసిన తీరుపై వివాదం తలెత్తడంతో ఇద్దరు ఎస్సైలు, ఒక కానిస్టేబుల్‌ను సస్పెండ్ చేశారు. లక్నో పశ్చిమ పోలీసులు ప్రస్తుతం కేసును విచారిస్తున్నారు. ప్రియుడు ఆమాన్‌ను పోలీసులు ఇప్పటికే అరెస్ట్ చేశారు. అమీనా పాత్ర కూడా స్పష్టమవ్వడంతో త్వరలోనే ఆమెను కూడా అదుపులోకి తీసుకుంటామని పోలీసులు తెలిపారు.
ఒక వివాహిత ప్రియుడి కోసం తన భర్త జీవితాన్ని నాశనం చేసేందుకు చేసిన ఈ కుట్ర ఇప్పుడు చర్చనీయాంశంగా మారింది.