కొత్త వ్యాపారాలను ప్రారంభించడం, సంపదను సృష్టించడంలో దేశం మొత్తానికి ఒక కమ్యూనిటీ మార్గదర్శిగా ఉంది. వారే గుజరాతీయులు. గత ఏడాది గణాంకాల ప్రకారం, దేశంలోని 191 మంది బిలియనీర్లలో 108 మంది గుజరాతీలే. అంటే సగానికి పైగా అన్నమాట. ఇది యాదృచ్ఛికంగా జరిగింది కాదు.
గణాంకాలు ఏం చెబుతున్నాయి?
భారతదేశ జనాభాలో గుజరాతీయులు కేవలం 5% మాత్రమే. కానీ దేశ జిడిపిలో వారి వాటా 8% పైగా ఉంది. అంతేకాదు, ఒక సగటు అమెరికన్ కంటే కూడా గుజరాతీలు మూడు రెట్లు ఎక్కువ సంపాదిస్తున్నారని అంచనా. ధీరూభాయ్ అంబానీ నుండి గౌతమ్ అదానీ వరకు భారతదేశంలోని అతిపెద్ద ధనవంతులు గుజరాతీయులే.
విజయానికి ప్రధాన కారణాలు:
1. చిన్నతనం నుండే వ్యాపార పాఠాలు: గుజరాతీ కుటుంబాల్లో పిల్లలకు చిన్నప్పటి నుండే వ్యాపార మెళకువలు నేర్పిస్తారు. వ్యాపారంలో రిస్క్ తీసుకోకపోతే అభివృద్ధి ఉండదని వారు నమ్ముతారు. వారి ఇళ్లలో కేవలం సాధారణ విషయాలే కాకుండా.. ఆవిష్కరణలు, నికర లాభం (Net Profit), పెట్టుబడి వంటి అంశాల గురించి చర్చించుకుంటారు.
2. విలాసాల కంటే పెట్టుబడికే ప్రాధాన్యత: మన దగ్గర యువత సంపాదించగానే ఖరీదైన బైక్‌లు లేదా కార్లు కొనాలని అనుకుంటారు. కానీ, గుజరాతీ యువత లక్ష్యం మాత్రం ఒక ఫ్యాక్టరీని లేదా సొంత వ్యాపారాన్ని స్థాపించడం. వారు విలాసవంతమైన జీవితం కోసం పరిగెత్తరు, జీవితాన్ని సౌకర్యవంతంగా మార్చే ‘ఆస్తుల’ (Assets) కోసం పనిచేస్తారు.
3. ఉద్యోగం కాదు.. యజమాని కావాలనే తపన: సగటు మధ్యతరగతి కుటుంబాల్లో ‘సురక్షితమైన ఉద్యోగం’ కోసం పిల్లలను ప్రోత్సహిస్తే, గుజరాతీ కుటుంబాల్లో మాత్రం ‘యజమాని (Owner) కావాలి, లాభాలు గడించాలి’ అనే ఆలోచనలను నూరిపోస్తారు. ఆర్థిక క్రమశిక్షణ, సంక్షోభాలను ఎదుర్కొనే సామర్థ్యం వారి రక్తంలోనే ఉంటుంది.
4. ఐక్యత మరియు పరస్పర సహకారం: గుజరాతీ సమాజంలో ఐక్యత చాలా ఎక్కువ. సూరత్ డైమండ్ మార్కెట్ అయినా, రాజ్‌కోట్ పారిశ్రామిక రంగం అయినా వారి మధ్య అద్భుతమైన సమన్వయం ఉంటుంది. ‘మన వాళ్లు.. మన వ్యాపారం’ అనే భావనతో ఒకరికొకరు సహాయం చేసుకుంటారు.