మహారాష్ట్ర రాజకీయ దిగ్గజం అజిత్ పవార్ అకాల మరణం పవార్ కుటుంబాన్ని కోలుకోలేని దెబ్బ తీసింది. బుధవారం ముంబై నుండి బారామతికి వస్తుండగా జరిగిన విమాన ప్రమాదంలో ఆయన మరణించిన సంగతి తెలిసిందే. ఈ విషాద వార్త తెలిసిన తర్వాత అజిత్ పవార్ సోదరి, ఎంపీ సుప్రియా సూలే ఒక వృద్ధుడిని హత్తుకుని బావురుమన్నారు. అజిత్ పవార్ భార్య సునేత్రా పవార్ కూడా అదే వ్యక్తిని పట్టుకుని విలపించారు.
ఎవరా వృద్ధుడు?
ఆ వృద్ధుడు మరెవరో కాదు.. శరద్ పవార్ అత్యంత సన్నిహితుడైన విఠల్ సేథ్ మణియార్.
- దశాబ్దాల స్నేహం: విఠల్ సేథ్ ఒక ప్రముఖ వ్యాపారవేత్త. శరద్ పవార్ రాజకీయాల్లోకి ప్రవేశించిన తొలి రోజుల్లోనే వారిద్దరి మధ్య స్నేహం మొదలైంది. వీరిద్దరి స్నేహం దశాబ్దాల కాలం నాటిది.
- శత్రువులే మిత్రులయ్యారు: కాలేజీ రోజుల్లో విఠల్ సేథ్ విద్యార్థి సంఘం ఎన్నికల్లో శరద్ పవార్‌పైనే పోటీ చేశారు. ఆ ఎన్నికల్లో ఓడిపోయినప్పటికీ, ఆ ఓటమి ద్వారా తనకు ఒక మంచి స్నేహితుడు లభించాడని ఆయన గతంలో ఒక ఇంటర్వ్యూలో గుర్తుచేసుకున్నారు.
- కుటుంబ సభ్యుడిలా: శరద్ పవార్ కుటుంబంతో ఆయనకు ఎంతటి అనుబంధం ఉందో, సుప్రియా సూలే ఆయన్ని హత్తుకుని ఏడ్చిన తీరును చూస్తే అర్థమవుతుంది. పవార్ కుటుంబంలో ఆయన ఒక పెద్ద దిక్కులా ఉంటారు.
బారామతిలో విషాదం:
అజిత్ పవార్ 1991 నుండి బారామతి ఎమ్మెల్యేగా పనిచేస్తూ ఆ ప్రాంతంతో విడదీయలేని బంధాన్ని కలిగి ఉన్నారు. బారామతిలో ఒక ఎన్నికల ర్యాలీలో ప్రసంగించాల్సి ఉన్న తరుణంలోనే ఈ ప్రమాదం జరిగింది. విమానం కూలిపోయిన తీరు అత్యంత భయానకంగా ఉంది, విమానం పూర్తిగా కాలి బూడిదయ్యింది. అజిత్ పవార్‌తో పాటు మరో నలుగురు ఈ ప్రమాదంలో మరణించారు.