కేరళ, పతనంతిట్ట: నిద్రిస్తున్న భార్య, పిల్లలను గదిలో బంధించి, వారిపై థిన్నర్ పోసి సవతి తండ్రి ఇంటికి నిప్పు పెట్టిన దారుణ ఘటన కేరళలోని కోన్నిలో జరిగింది. మంటలు వ్యాపించిన సమయంలో 15 ఏళ్ల బాలుడు ప్రాణాలకు తెగించి తన చెల్లెలిని రక్షించాడు.
ఘటన వివరాలు: వడశేరిక్కర నివాసి అయిన సిజు ప్రసాద్ (43), తన భార్య రజని (40), కుమారుడు ప్రవీణ్ (15), మరియు చిన్న కుమార్తెతో కలిసి అద్దె ఇంట్లో నివసిస్తున్నాడు. శనివారం తెల్లవారుజామున ఒక గంట సమయంలో, అందరూ నిద్రిస్తున్న వేళ సిజు ప్రసాద్ బయటకు వచ్చి, గదిలోకి థిన్నర్ పోసి వెంటిలేటర్ ద్వారా నిప్పు విసిరాడు.
మంటలు చెలరేగడంతో అప్రమత్తమైన ప్రవీణ్, గదిలోని ఇనుప దూలాన్ని పట్టుకుని పైకి ఎగబాకి, ఇంటిపై ఉన్న పెంకులను తొలగించి తన చెల్లెలిని సురక్షితంగా బయటకు పంపాడు. తన తల్లిని కూడా పైకి లాగాలని ప్రయత్నించినప్పటికీ అది సాధ్యపడలేదు. అరుపులు విన్న స్థానికులు వచ్చి తలుపులు పగులగొట్టి రజనిని కాపాడారు.
ప్రస్తుతం రజని, ప్రవీణ్ ఆసుపత్రిలో చికిత్స పొందుతున్నారు. ఘటన తర్వాత పరారైన సిజు ప్రసాద్‌ను పోలీసులు పూంకావ్‌లో అరెస్ట్ చేశారు. కుటుంబ కలహాలే ఈ దారుణానికి కారణమని పోలీసులు తెలిపారు.