అమెరికా న్యాయ శాఖ శుక్రవారం రాత్రి ఎప్స్టీన్ ఫైల్స్‌కు సంబంధించి 30 లక్షలకు పైగా కొత్త పత్రాలను విడుదల చేసింది. ఇందులో ప్రపంచవ్యాప్తంగా ఉన్న అత్యంత ప్రభావవంతమైన వ్యక్తుల పేర్లు ఉన్నాయి. ముఖ్యంగా బ్రిటీష్ రాజకుటుంబం నుండి బహిష్కరణకు గురైన మాజీ ప్రిన్స్ ఆండ్రూకి సంబంధించిన కొన్ని వివాదాస్పద ఫోటోలు బయటకు వచ్చాయి.
ఫోటోలలో ఏముంది? ఈ చిత్రాలలో ఆండ్రూ ఒక మహిళ పైన నాలుగు కాళ్లపై వంగి ఉన్నట్లు కనిపిస్తుంది, ఆ మహిళ నేలపై పడుకుని ఉంది. మూడు చిత్రాలలో ఆయన ఆమెపైకి వంగి ఉండగా, ఒక చిత్రంలో నేరుగా కెమెరా వైపు చూస్తున్నారు. మరో చిత్రంలో ఆయన చేయి ఆ మహిళ పొత్తికడుపుపై ఉంది. ఆండ్రూ జీన్స్ మరియు వైట్ పోలో షర్ట్ ధరించి, చెప్పులు లేకుండా ఉన్నారు. ఈ ఫోటోలలో ఉన్న మహిళ ముఖాన్ని గుర్తుపట్టకుండా నలుపు రంగుతో అస్పష్టం (Redaction) చేశారు.
బకింగ్‌హామ్ ప్యాలెస్‌లో డిన్నర్ ప్రస్తావన: బయటకు వచ్చిన ఈమెయిల్స్ ప్రకారం, సెప్టెంబర్ 2010లో ఎప్స్టీన్ జైలు నుండి విడుదలైన కొద్దిరోజులకే ఆండ్రూ అతడిని బకింగ్‌హామ్ ప్యాలెస్‌కు విందుకు ఆహ్వానించారు. “మనం ఇక్కడ డిన్నర్ చేయవచ్చు, ఇక్కడ పూర్తి గోప్యత ఉంటుంది” అని ఆండ్రూ భరోసా ఇచ్చినట్లు ఈమెయిల్స్ వెల్లడిస్తున్నాయి. అలాగే ఒక 26 ఏళ్ల రష్యన్ మహిళను ఆండ్రూకి పరిచయం చేస్తానని ఎప్స్టీన్ ప్రతిపాదించగా, అందుకు ఆయన అంగీకరించినట్లు సమాచారం.
ఇతర ప్రముఖుల పేర్లు: ఈ ఫైల్స్‌లో బిల్ గేట్స్, డొనాల్డ్ ట్రంప్, ఎలాన్ మస్క్ వంటి వారి పేర్లు కూడా ప్రస్తావనకు వచ్చాయి. రష్యన్ మహిళల ద్వారా బిల్ గేట్స్‌కు కొన్ని అనారోగ్య సమస్యలు తలెత్తాయని ఎప్స్టీన్ పేర్కొన్నట్లు డాక్యుమెంట్లు చెబుతున్నాయి. అలాగే ఒక మసాజ్ థెరపిస్ట్ ఇచ్చిన వాంగ్మూలంలో ఎప్స్టీన్‌తో పాటు ఆండ్రూ మరియు డొనాల్డ్ ట్రంప్‌ను చూసినట్లు తెలిపారు. అయితే ట్రంప్ మరియు ఆండ్రూ తమపై వచ్చిన ఆరోపణలను తోసిపుచ్చారు.