క్యాన్సర్ నిర్ధారణ కోసం ఇప్పటివరకు రక్తం, బయాప్సీ మరియు స్కాన్ వంటి క్లిష్టమైన, ఖరీదైన పరీక్షలు అందుబాటులో ఉన్నాయి. కానీ ఇప్పుడు బ్రెజిల్ శాస్త్రవేత్తలు ఎటువంటి నొప్పి లేకుండా, శస్త్రచికిత్స అవసరం లేకుండా, తక్కువ ఖర్చుతో కూడిన ఒక కొత్త పద్ధతిని కనుగొన్నారు.
ఈ కొత్త పరిశోధన ప్రకారం, చెవిలోని గుమిలి (Earwax) శరీరంలో దాగి ఉన్న తీవ్రమైన వ్యాధులను, ముఖ్యంగా క్యాన్సర్‌ను గుర్తించగలదని తేలింది. బ్రెజిల్‌లోని ఫెడరల్ యూనివర్శిటీ ఆఫ్ గోయాస్ (UFG) నిర్వహించిన ఈ పరిశోధనకు “సెరుమెనోగ్రామ్” (Cerumenogram) అని పేరు పెట్టారు. దీనికి 2025 CAPS అవార్డులలో ప్రత్యేక ప్రశంసలు కూడా లభించాయి.
చెవి గుమిలి ‘హెల్త్ ఫింగర్ ప్రింట్’ ఎలా అయ్యింది? మన శరీరం పూర్తిగా ఆరోగ్యంగా ఉన్నప్పుడు, చెవి గుమిలి యొక్క రసాయన నిర్మాణం ఒకే విధంగా ఉంటుంది. కానీ శరీరంలో క్యాన్సర్ వంటి తీవ్రమైన వ్యాధి మొదలైనప్పుడు, ఈ గుమిలిలోని కెమికల్ ప్రొఫైల్ మారడం ప్రారంభిస్తుంది. పరిశోధన సమన్వయకర్త నెల్సన్ ఆంటోనియోసి ఫిల్హో ప్రకారం, “నేడు చెవి గుమిలి మన ఆరోగ్యం యొక్క ఫింగర్ ప్రింట్‌గా మారింది.” అంటే మన శరీరంలో ఏం జరుగుతుందో తెలుసుకోవడానికి ఇది ఒక క్లూలా పనిచేస్తుంది.
ఈ పరీక్ష ఎంత ఖచ్చితమైనది? ఈ పరిశోధనలో భాగంగా 751 మంది నమూనాలను సేకరించారు:
- క్యాన్సర్ ఉన్న 531 మంది: పరీక్షలో వీరందరికీ క్యాన్సర్ ఉన్నట్లు ఖచ్చితంగా తేలింది.
- ఆరోగ్యవంతులైన 220 మంది: వీరిలో కేవలం 5 మంది నమూనాలు అనుమానాస్పదంగా కనిపించగా, తర్వాత ఇతర వైద్య పరీక్షల్లో వారందరికీ క్యాన్సర్ ఉన్నట్లు నిర్ధారణ అయ్యింది. అందుకే ఈ పరీక్ష అత్యంత ఖచ్చితమైనదిగా భావిస్తున్నారు.
ప్రీ-క్యాన్సర్ స్టేజ్‌ను కూడా గుర్తించవచ్చా? 2025లో శాస్త్రవేత్తలకు మరొక పెద్ద విజయం లభించింది. ఈ పరీక్ష ద్వారా క్యాన్సర్ కణితి ఏర్పడకముందే (Pre-Cancer Stage) వ్యాధిని గుర్తించవచ్చని తేలింది. దీనివల్ల:
- వ్యాధి తీవ్రత పెరగకముందే చికిత్స ప్రారంభించవచ్చు.
- తక్కువ ఖర్చుతో, సులభంగా చికిత్స చేయవచ్చు.
- రోగి ప్రాణాలు కాపాడే అవకాశం ఎక్కువగా ఉంటుంది.
అల్జీమర్స్, పార్కిన్సన్ మరియు డిమెన్షియా వంటి నాడీ సంబంధిత వ్యాధులను కూడా ఈ పద్ధతి ద్వారా గుర్తించే పనిలో శాస్త్రవేత్తలు నిమగ్నమై ఉన్నారు.