ఫుకుషిమా రేడియోధార్మిక నీరు: సాధారణంగా ఏదైనా ప్రదేశం రేడియోధార్మికత (Radioactive) బారిన పడితే, అక్కడ ఏ జీవి అయినా బతకడం అసాధ్యం. అయితే చెర్నోబిల్‌లోని ఉత్పరివర్తన చెందిన (Mutated) తోడేళ్లు, బ్యాక్టీరియాలు అత్యంత రేడియేషన్ ఉన్న వాతావరణంలో కూడా జీవించగలిగాయి.
ఇప్పుడు జపాన్‌లోని ఫుకుషిమా దైచీ న్యూక్లియర్ పవర్ స్టేషన్‌లో జరిగిన ఒక ఆవిష్కరణ నిపుణులను విస్మయానికి గురిచేసింది. ‘పాపులర్ మెకానిక్స్’ నివేదిక ప్రకారం.. సాంకేతికంగా జీవనం అస్సలు సాధ్యం కాని చోట సూక్ష్మజీవులు సంచరిస్తూ కనిపించాయి.
రేడియేషన్ నీటిలో జీవనం
2011లో వచ్చిన భూకంపం, సునామీ కారణంగా ఈ పవర్ స్టేషన్ దెబ్బతిని మూతపడింది. ఆ సమయంలో సునామీ నీరు రియాక్టర్ భవనాల్లోకి ప్రవేశించి రేడియోధార్మిక వ్యర్థాలతో కలిసిపోయింది. ఆశ్చర్యకరంగా, ప్రాణవాయువు లేదా జీవం పెంపొందడానికి ఏమాత్రం అవకాశం లేని ఆ నీటిలో సూక్ష్మజీవుల భారీ కాలనీ వెలిసింది. చెర్నోబిల్ తోడేళ్ల మాదిరిగానే ఈ సూక్ష్మజీవులకు కూడా జన్యుపరమైన ప్రతిఘటన శక్తి (Genetic Resistance) ఉండి ఉండవచ్చని భావిస్తున్నారు.
రేడియేషన్‌లో పెరుగుతున్న మైక్రోబ్స్ (సూక్ష్మజీవులు)
టోక్యోలోని కీయో యూనివర్సిటీకి చెందిన బయాలజిస్టులు తోమోరో వరాషినా మరియు అకియో కనాయ్.. రియాక్టర్ భవనం కింద ఉన్న రేడియోధార్మిక నీటి నమూనాలను విశ్లేషించారు. అక్కడ వారికి రేడియేషన్‌ను తట్టుకోగల ప్రత్యేక జాతులు కనిపిస్తాయని భావించారు, కానీ అక్కడ అలాంటి ప్రత్యేక జాతులు ఏవీ లేవు. అయినప్పటికీ సాధారణ సూక్ష్మజీవులు అక్కడ అభివృద్ధి చెందుతున్నాయి. పరిశోధనలో వారు లిమ్నోబాక్టర్ (Limnobacter) మరియు బ్రెవిరాబ్డస్ (Brevirhabdus) వంశాలకు చెందిన బ్యాక్టీరియాను కనుగొన్నారు.
శాస్త్రవేత్తలను ఆశ్చర్యపరిచిన విషయం
ఈ సూక్ష్మజీవుల్లో రేడియేషన్‌ను తట్టుకునే సహజ రోగనిరోధక శక్తి (Immunity) లేదు. అయినా అవి ఆ విషపూరిత వాతావరణంలో ఎలా బతుకుతున్నాయి?
- బయోఫిల్మ్ (Biofilm): లోహ ఉపరితలాలపై ఏర్పడిన ‘బయోఫిల్మ్’ వల్ల ఇవి బతుకుతున్నాయని పరిశోధకులు భావిస్తున్నారు.
- రక్షణ కవచం: అత్యవసర కూలింగ్ వాటర్ మరియు సముద్రపు నీరు కలవడం వల్ల ఏర్పడిన జిగట పొర (Sticky Layer) ఈ బ్యాక్టీరియా చుట్టూ ఒక కవచంలా ఏర్పడి, రేడియేషన్ నుండి రక్షణ ఇచ్చి ఉండవచ్చు.
- ముగింపు: రేడియేషన్ ప్రభావం ఈ సూక్ష్మజీవుల ఎంపికపై దాదాపు సున్నా అని శాస్త్రవేత్తలు గుర్తించారు.