లక్నో: ఉత్తరప్రదేశ్ రాజధాని లక్నోలోని చౌపటియా కాలనీలో అత్యంత భయానక ఘటన వెలుగులోకి వచ్చింది. ఇక్కడ ఒక ఆవు అకస్మాత్తుగా ఒక చిన్నారిపై దాడి చేసింది. దీనికి సంబంధించిన సీసీటీవీ (CCTV) ఫుటేజీ ప్రస్తుతం ఇంటర్నెట్‌లో వైరల్ అవుతోంది. ఈ దృశ్యాలు చూస్తే ఎవరికైనా వెన్నులో వణుకు పుట్టకమానదు.
వైరల్ వీడియోలో.. ఒక ఆవు వేగంగా పరుగెత్తుకుంటూ వచ్చి బాలికను వెంబడించడం కనిపిస్తుంది. భయంతో పరుగెత్తిన ఆ చిన్నారి కొద్ది దూరంలోనే కింద పడిపోయింది. ఆ తర్వాత జరిగిన దృశ్యం అత్యంత దారుణం. ఆ ఆవు కనికరం లేకుండా బాలికను తొక్కడం, కొమ్ములతో పొడవడం ప్రారంభించింది. ఆవు అంత ఆవేశంగా ఉండటం చూసి అక్కడ ఉన్నవారు సైతం ఒక్క క్షణం భయపడిపోయారు.
బాలికను ఈడ్చుకెళ్లిన ఆవు
వీడియోలో ఉన్న అత్యంత భయంకరమైన దృశ్యం ఏమిటంటే.. ఆ ఆవు ఆ చిన్నారి జుట్టును తన నోటితో పట్టుకుని చాలా దూరం వరకు ఈడ్చుకుంటూ వెళ్లింది. బాలిక ఆర్తనాదాలు, ఆ నిస్సహాయ స్థితి చూస్తుంటే కళ్లు చెమర్చక మానవు.
ప్రాణాలకు తెగించి కాపాడిన స్థానికులు
ఘటన జరుగుతున్న సమయంలో అక్కడున్న వారు బాలికను రక్షించడానికి పరిగెత్తారు. కానీ ఆవు అంత భయంకరంగా దాడి చేస్తుండటంతో దాని దగ్గరికి వెళ్లడానికి ఎవరూ సాహసించలేకపోయారు. చివరకు స్థానికులు రాళ్లు తీసుకుని ఆవుపైకి విసరడం మొదలుపెట్టారు. అలా నిరంతరం రాళ్లతో కొట్టడంతో, ఆవు చివరకు బాలికను వదిలేసి అక్కడి నుండి పారిపోయింది.
నెటిజన్ల ఆందోళన
ఈ వీడియో చూసిన నెటిజన్లు తీవ్రంగా స్పందిస్తున్నారు. “దేవుడా, ఆ చిన్నారికి ఏమీ కాకూడదు, ఇది నిజంగా భయంకరమైన అనుభవం” అని ఒకరు వ్యాఖ్యానించగా.. నగరాల్లో వీధి పశువుల బెడదపై మరికొందరు ఆందోళన వ్యక్తం చేస్తున్నారు.