చెన్నై: తమిళనాడు బీజేపీ 2026 అసెంబ్లీ ఎన్నికల దిశగా అడుగులు వేస్తున్న తరుణంలో, ఆ పార్టీ మాజీ అధ్యక్షుడు అణ్ణామలై తీసుకున్న నిర్ణయం పార్టీలోనే కాకుండా తమిళ రాజకీయాల్లోనూ పెద్ద చర్చకు దారితీసింది. ఎన్నికల బాధ్యతల నుంచి తాను తప్పుకుంటున్నట్లు ఆయన ప్రకటించడంతో, ఇది వ్యక్తిగత నిర్ణయమా? లేక పార్టీ అధిష్ఠానంపై అసంతృప్తితో పంపిన సంకేతమా? అనే ప్రశ్నలు తలెత్తుతున్నాయి.
అసలేం జరిగింది?
2026 అసెంబ్లీ ఎన్నికలు సమీపిస్తున్న తర్వణంలో తమిళ రాజకీయాలు వేడెక్కాయి. కొంగు రీజియన్‌లోని ఆరు నియోజకవర్గాలకు ఇన్‌చార్జ్‌గా నియమితులైన అణ్ణామలై.. అకస్మాత్తుగా ఆ బాధ్యతల నుంచి తప్పుకుంటున్నట్లు ప్రకటించారు. తన తండ్రి ఆరోగ్యం బాగోలేదని, కుటుంబాన్ని చూసుకోవాల్సిన అవసరం ఉందని ఆయన కారణం చెప్పారు.
అయితే, రాజకీయ విశ్లేషకులు దీనిని పూర్తిగా అంగీకరించడం లేదు. గతంలో ప్రధాని మోదీ తన తల్లి మరణించిన కొద్దిసేపటికే ప్రభుత్వ కార్యక్రమాల్లో పాల్గొన్న ఉదాహరణలను చూపుతూ, అణ్ణామలై వెనుక రాజకీయ కారణాలు ఉండవచ్చని అనుమానిస్తున్నారు.
అణ్ణామలై నిర్ణయం వెనుక ఉన్న రాజకీయ కారణాలు:
- నయినార్ నాగేంద్రన్ – అణ్ణామలై మధ్య విబేధాలు: ప్రస్తుతం తమిళనాడు బీజేపీ అధ్యక్షుడిగా ఉన్న నయినార్ నాగేంద్రన్‌కు, అణ్ణామలైకు మధ్య పొసగడం లేదనేది బహిరంగ రహస్యం. పార్టీ భవిష్యత్తు, కూటమి రాజకీయాల విషయంలో అణ్ణామలై వైఖరిని అధిష్ఠానం పూర్తిగా సమర్థించడం లేదని తెలుస్తోంది.
- అన్నాడీఎంకే కూటమి అంశం: 2024 పార్లమెంట్ ఎన్నికల్లో అన్నాడీఎంకే (AIADMK) లేకుండా ఒంటరిగా వెళ్లాలని అణ్ణామలై పట్టుబట్టారు. బీజేపీకి 11 శాతం ఓట్లు సాధించి పెట్టి తన బలాన్ని నిరూపించుకున్నారు. కానీ ఇప్పుడు 2026 కోసం మళ్లీ అన్నాడీఎంకేతో కలవాలనేది అధిష్ఠానం నిర్ణయంగా కనిపిస్తోంది. ఇది అణ్ణామలైకు ఇష్టం లేదని సమాచారం.
- పదవుల విషయంలో నిరాశ: రాష్ట్ర అధ్యక్ష పదవి నుంచి తప్పుకున్నాక, జాతీయ స్థాయిలో కీలక పదవి వస్తుందని ఆయన ఆశించారు. కానీ ఆ ఆశలు నెరవేరకపోవడంతో అసంతృప్తితో ఉన్నట్లు రాజకీయ విశ్లేషకులు భావిస్తున్నారు.
- సీటు రాదనే భయం?: ఎన్నికల బాధ్యతలు చూసే ఇన్‌చార్జ్‌లకు సాధారణంగా టికెట్ ఇవ్వరనే నిబంధన పార్టీలో ఉంది. రాబోయే ఎన్నికల్లో పోటీ చేయాలనుకుంటున్న అణ్ణామలై.. అందుకే ఇన్‌చార్జ్ పదవిని వదులుకున్నారా అనే కోణంలోనూ చర్చ జరుగుతోంది.
బీజేపీకి నష్టమా?
అణ్ణామలై వంటి ఫేస్ లేకుండా 2026 ఎన్నికలకు వెళ్లడం బీజేపీకి మైనస్ అవుతుందని ఆయన మద్దతుదారులు సోషల్ మీడియాలో పోస్ట్లు పెడుతున్నారు. అయితే, పార్టీలో వ్యక్తుల కంటే సిద్ధాంతమే ముఖ్యమని, అణ్ణామలై ఉన్నా లేకపోయినా పార్టీ ముందుకు సాగుతుందని ఇతర నాయకులు అభిప్రాయపడుతున్నారు. అణ్ణామలై హయాంలో ‘వ్యక్తి పూజ’ పెరిగిపోయిందని, అందుకే పార్టీ ఆయనను పక్కన పెట్టిందని కొందరు విమర్శిస్తున్నారు.