ఆరోగ్యకరమైన ఆహారం తీసుకోవడం వల్ల మన శరీరంలో మంచి మార్పులు వస్తాయి. ముఖ్యంగా వయసు పెరగడం వల్ల వచ్చే చర్మం ముడతలు పడటం, మెరుపు కోల్పోవడం వంటి సమస్యలను మనం తీసుకునే ఆహారంతో అరికట్టవచ్చు. ఈరోజు మనం చెప్పుకోబోయే డ్రై ఫ్రూట్స్ లడ్డూలు మీ చర్మాన్ని యవ్వనంగా ఉంచడమే కాకుండా, శరీరానికి కావాల్సిన పోషకాలను కూడా అందిస్తాయి. ఇవి ఏ బేకరీలోనూ దొరకవు, మీరే ఇంట్లో సులభంగా తయారు చేసుకోవచ్చు.
లడ్డూ తయారీకి కావాల్సిన పదార్థాలు:
- వేరుశనగలు
- బాదం పప్పు
- పుట్నాల పప్పు
- తెల్ల నువ్వులు
- గుమ్మడి గింజలు
- కర్బూజ గింజలు
- నెయ్యి
- గసగసాలు
- ఎండు కొబ్బరి తురుము
- బెల్లం మరియు ఖర్జూరం
తయారు చేసే విధానం:
- మొదట బాణలిలో ఒక కప్పు వేరుశనగలను వేయించి పక్కన పెట్టుకోవాలి. ఆ తర్వాత బాదం పప్పు, అర కప్పు పుట్నాల పప్పును కూడా విడివిడిగా వేయించి పెట్టుకోవాలి.
- అర కప్పు తెల్ల నువ్వులు, 3 స్పూన్ల గుమ్మడి గింజలు, 2 స్పూన్ల కర్బూజ గింజలను కూడా దోరగా వేయించి తీసుకోవాలి.
- ఇప్పుడు బాణలిలో నెయ్యి వేసి, చిన్నగా తరిగిన జీడిపప్పు, పిస్తా పప్పులను వేయించాలి. 2 నిమిషాల తర్వాత గసగసాలు, మరికొన్ని నువ్వులు వేసి బాగా కలపాలి.
- దీనికి అర కప్పు కొబ్బరి తురుము కూడా కలిపి మరో 2 నిమిషాలు వేయించాలి.
- ఇప్పుడు ఒక మిక్సీ జార్ తీసుకుని, వేయించి పెట్టుకున్న పుట్నాల పప్పు, కొబ్బరి ముక్కలను పొడి చేసి ఒక ప్లేట్ లో ఉంచాలి. ఆ తర్వాత బాదం, వేరుశనగలు, గుమ్మడి గింజలను కూడా కచ్చాపచ్చాగా (మరీ మెత్తగా కాకుండా) పొడి చేసుకోవాలి.
- మళ్ళీ బాణలిలో కొద్దిగా నెయ్యి వేసి, చిన్నగా తరిగిన ఖర్జూరాలు మరియు ఒక కప్పు బెల్లం పొడి వేసి బాగా కలపాలి.
- బెల్లం కరిగిన తర్వాత మనం తయారు చేసి పెట్టుకున్న పొడులన్నీ మరియు మిగిలిన డ్రై ఫ్రూట్స్ అన్నింటినీ అందులో వేయాలి.
- 3 నుండి 4 నిమిషాల పాటు తక్కువ మంటపై కలపాలి. మిశ్రమం ఉండలు కట్టడానికి వీలుగా జిగురుగా మారాలి. ఒకవేళ మిశ్రమం మరీ పొడిగా అనిపిస్తే కొద్దిగా వేడి పాలు కలపవచ్చు.
- చివరగా మిశ్రమం గోరువెచ్చగా ఉన్నప్పుడే చిన్న చిన్న లడ్డూల్లా చుట్టుకోవాలి.
ప్రతిరోజూ ఈ లడ్డూను తీసుకోవడం వల్ల మీ చర్మం ఆరోగ్యంగా ఉండటమే కాకుండా మీలో ఉత్సాహం పెరుగుతుంది.