పాలక్కాడ్: కేరళలోని పాలక్కాడ్‌లో ఒక విషాదకర ఘటన చోటుచేసుకుంది. తన ఇంట్లోని బాత్‌రూమ్‌లో ఒక విద్యార్థి ఉరివేసుకుని విగతజీవిగా కనిపించాడు. మృతుడు ఎలక్కోడ్ ప్రాంతానికి చెందిన శివప్రసాద్-సజిత దంపతుల కుమారుడు విశ్వజిత్ (13).
విశ్వజిత్ కొళింజాంపరలోని సెయింట్ పాల్స్ స్కూల్‌లో ఏడో తరగతి చదువుతున్నాడు.
అసలేం జరిగిందంటే? ఈ రోజు ఉదయం ఈ ఘటన జరిగింది. విశ్వజిత్ ఎప్పటిలాగే స్నానం చేయడానికి బాత్‌రూమ్‌లోకి వెళ్లాడు. అయితే ఎంతసేపటికీ బయటకు రాకపోవడంతో ఆందోళన చెందిన తల్లిదండ్రులు తలుపులు పగలగొట్టి చూడగా.. తువ్వాలుతో ఉరివేసుకుని వేలాడుతూ కనిపించాడు.
కారణం: స్థానిక ఫుట్‌బాల్ అకాడమీలో శిక్షణకు వెళ్తానని విశ్వజిత్ తన తల్లిదండ్రులను కోరాడు. అయితే ఇప్పుడు వద్దు, తర్వాత వెళ్లవచ్చు అని తల్లిదండ్రులు సమాధానమిచ్చారు. దీనితో మనస్తాపం చెందిన బాలుడు ఈ అఘాయిత్యానికి పాల్పడినట్లు పోలీసుల ప్రాథమిక విచారణలో తేలింది. పంచనామా అనంతరం మృతదేహాన్ని జిల్లా ఆసుపత్రి మార్చురీకి తరలించారు.