చెన్నై: తమిళనాడు అసెంబ్లీ ఎన్నికలు సమీపిస్తున్న వేళ, తిరుచ్చి సహా ముఖ్య నగరాల్లో రాజకీయ వాతావరణం వేడెక్కుతోంది. ముఖ్యంగా జయలలిత నెచ్చెలి శశికళ వేస్తున్న అడుగులు అన్నాడీఎంకే (AIADMK) మరియు దాని కూటమి పార్టీల్లో తీవ్ర చర్చకు దారితీస్తున్నాయి. శశికళ ఏదో భారీ వ్యూహంతో మళ్లీ రాజకీయాల్లోకి వస్తున్నట్లు కనిపిస్తోంది. ఇందులో విజయ్ మరియు దినకరన్ పాత్రలేంటి?
ఆస్తుల కేసులో జైలు నుండి విడుదలయ్యాక అన్నాడీఎంకేను కైవసం చేసుకుంటానని చెప్పిన శశికళకు, ఎడప్పాడి పళనిస్వామి (EPS) నుండి ఎదురైన తీవ్ర వ్యతిరేకత అడ్డంకిగా మారింది.
శశికళ కొత్త పార్టీ దక్షిణ జిల్లాల పర్యటనలు ఆశించిన స్థాయిలో సక్సెస్ కాకపోవడంతో, శశికళ ఇప్పుడు “సపరేట్ రూట్” ఎంచుకున్నారు. ప్రస్తుతం అన్నాడీఎంకే-బీజేపీ కూటమిలో దినకరన్‌కు చెందిన అమ్మ మక్కల్ మున్నేట్ర కజగం (AMMK) చేరడం శశికళకు తీవ్ర ఆగ్రహాన్ని కలిగించినట్లు తెలుస్తోంది. దినకరన్‌కు వ్యక్తిగత బలం లేదని, దక్షిణ జిల్లాల్లో పట్టు తనకే ఉందని నిరూపించడానికి ఆమె సిద్ధమయ్యారు.
అమ్మ అన్నాడీఎంకే ముఖ్యంగా దినకరన్ నిర్ణయం పట్ల అసంతృప్తిగా ఉన్న వర్గాలను తన వైపు తిప్పుకోవడం ద్వారా అన్నాడీఎంకే, ఏఎంఎంకే ఓటు బ్యాంకును దెబ్బతీయాలని శశికళ వ్యూహం పన్నారు. దీనిలో భాగంగా ఫిబ్రవరి 24న (జయలలిత జయంతి) చెన్నై మెమోరియల్ వద్ద “అమ్మ అన్నాడీఎంకే” అనే కొత్త పార్టీని ప్రారంభించాలని ఆమె యోచిస్తున్నట్లు సమాచారం.
విజయ్‌తో పొత్తు? మరో ఆసక్తికరమైన అంశం ఏమిటంటే, విజయ్ నేతృత్వంలోని ‘తమిళగ వెట్రి కజగం’ (TVK) తో పొత్తు పెట్టుకోవాలని శశికళ భావిస్తున్నారు. తెర వెనుక ఇందుకు సంబంధించిన చర్చలు జోరుగా సాగుతున్నాయని, కొందరు రాయబారులు మధ్యవర్తిత్వం వహిస్తున్నారని టాక్. మొదట్లో విజయ్ కాస్త వెనకడుగు వేసినా, దక్షిణ జిల్లాల ఓట్ల కోసం శశికళతో చేతులు కలపడానికి అంగీకరించే అవకాశం ఉందని రాజకీయ విశ్లేషకులు భావిస్తున్నారు.
దినకరన్ ఉరుకులు పరుగుల పయనం మొన్న చెన్నైలోని అన్నా మెమోరియల్ వద్ద నివాళులర్పించడానికి శశికళ కారులో వచ్చారు. అదే సమయంలో అక్కడే ఉన్న దినకరన్, ఆమె వస్తున్నారన్న సమాచారం అందగానే హడావిడిగా తన ఇంటర్వ్యూను ముగించుకుని అక్కడి నుండి వెళ్లిపోయారు. కనీసం ఒకరినొకరు పలకరించుకోకుండా వెళ్లడం చూసి ఇరు వర్గాల మద్దతుదారులు అయోమయానికి గురయ్యారు. ఇది ఇప్పుడు హాట్ టాపిక్‌గా మారింది.
ఎన్నికల ఖర్చులన్నీ తానే భరిస్తానని చెప్తున్న శశికళ, దినకరన్‌ను రాజకీయంగా దెబ్బకొట్టి తన ఉనికిని చాటుకోవాలని చూస్తున్నారు. శశికళ మరియు విజయ్ కలిస్తే తమిళనాడు ఎన్నికల యుద్ధం నాలుగు ముఖాల పోటీగా మారి ఊహించని మలుపులు తిరుగుతుందా? వేచి చూడాలి!