గురుగ్రామ్‌లోని DLF ఫేజ్ 3 ప్రాంతంలో ఉన్న ఒక పేయింగ్ గెస్ట్ (PG) వసతి గృహంలో నలుగురు మైనర్ పిల్లలను కొంతమంది వ్యక్తులు బందీలుగా ఉంచి, వారిపై క్రూరంగా దాడి చేశారు.
పోలీసుల సమాచారం ప్రకారం, ఆ పిల్లలను వివస్త్రలను చేసి, దారుణంగా కొట్టడమే కాకుండా, నిందితులు వారి ప్రైవేట్ భాగాలపై పెట్రోల్ పోసి హింసించారు.
PTI నివేదిక ప్రకారం, ఆ పిల్లల తల్లులు అక్కడికి చేరుకుని, నిందితులను బ్రతిమాలడంతో వారు పిల్లలను విడిచిపెట్టారు. అనంతరం బాధితులు పోలీసులకు ఫిర్యాదు చేయగా, ఇద్దరు నిందితులను అరెస్ట్ చేశారు.
అసలేం జరిగింది? సమీపంలోని నిర్మాణంలో ఉన్న భవనంలో ఈ పిల్లలు దొంగతనం చేయడానికి వచ్చారనే అనుమానంతోనే వారిని బందీలుగా ఉంచినట్లు అరెస్ట్ అయిన నిందితులు పోలీసులకు తెలిపారు. రిపోర్టుల ప్రకారం, నిందితులు పిల్లలను వివస్త్రలను చేసి, వేడి చెంచాలతో ఒంటిపై కాల్చారు మరియు వారి ప్రైవేట్ భాగాలపై పెట్రోల్ పోశారు.
తల్లి ఫిర్యాదు: సోమవారం సాయంత్రం పని నుండి ఇంటికి వచ్చిన ఒక తల్లికి తన 12 ఏళ్ల కుమారుడు కనిపించలేదు. వెతుకుతుండగా, మరో మహిళ తన ఇద్దరు పిల్లలు కూడా కనిపించడం లేదని చెప్పింది. ఇద్దరూ కలిసి వెతుకుతుండగా, సమీపంలోని ఒక PGలో కొందరు వ్యక్తులు నలుగురు పిల్లలను గదిలో వేసి కొడుతున్నారని సమాచారం అందింది.
అక్కడికి చేరుకున్న తల్లులకు ఐదు నుండి ఆరుగురు వ్యక్తులు తమ పిల్లలను బందీలుగా ఉంచి హింసిస్తున్నట్లు కనిపించింది. వారు ఎంతగానో ప్రాధేయపడటంతో నిందితులు పిల్లలను విడిచిపెట్టారు. మంగళవారం అధికారికంగా కేసు నమోదు చేయడంతో పోలీసులు రంగంలోకి దిగి ఇద్దరు అనుమానితులను అదుపులోకి తీసుకున్నారు. పరారీలో ఉన్న మిగిలిన వారి కోసం గాలింపు కొనసాగుతోంది.