England U19 vs India U19, Final: భారత అండర్-19 జట్టు 2026 ప్రపంచకప్‌లో అద్భుత ప్రదర్శన చేస్తూ, ఫైనల్‌లో ఇంగ్లాండ్‌ను ఓడించి టైటిల్‌ను కైవసం చేసుకుంది. అండర్-19 క్రికెట్‌లో భారత్‌కు ఇది ఆరో ట్రోఫీ. దీనితో ఈ టోర్నమెంట్‌లో అత్యధిక సార్లు ఛాంపియన్‌గా నిలిచిన జట్టుగా భారత్ అవతరించింది.
ఈ చారిత్రాత్మక విజయం భారత యువ క్రికెట్ శక్తిని మరియు భవిష్యత్తును మరోసారి ప్రపంచానికి చాటిచెప్పింది.
హరారేలో జరిగిన ఫైనల్ మ్యాచ్‌లో టాస్ గెలిచిన భారత జట్టు మొదట బ్యాటింగ్ ఎంచుకుంది. 20 పరుగుల వద్ద ఆరోన్ జార్జ్ (9) వికెట్‌ను కోల్పోయినప్పటికీ, వైభవ్ సూర్యవంశీ మరియు కెప్టెన్ మ్హాత్రే కలిసి రెండో వికెట్‌కు 90 బంతుల్లో 142 పరుగులు జోడించి స్కోరును 162కు చేర్చారు.
వైభవ్ సూర్యవంశీ వీరోచిత ఇన్నింగ్స్ (175 పరుగులు)
కెప్టెన్ మ్హాత్రే 51 బంతుల్లో 53 పరుగులు (2 సిక్సర్లు, 7 ఫోర్లు) చేసి అవుట్ కాగా, సూర్యవంశీ – వేదాంత్ త్రివేదితో కలిసి కేవలం 39 బంతుల్లోనే 89 పరుగుల భాగస్వామ్యాన్ని నెలకొల్పి స్కోరు బోర్డును పరుగులు పెట్టించారు. వైభవ్ 80 బంతుల్లోనే 15 ఫోర్లు, 15 సిక్సర్లతో 175 పరుగులు చేసి వెనుదిరిగారు. అనంతరం వేదాంత్, విహాన్ మల్హోత్రాతో కలిసి నాలుగో వికెట్‌కు 51 పరుగులు జోడించడంతో భారత్ 300 పరుగుల మార్కును దాటింది.
భారత్ భారీ స్కోరు: 411 పరుగులు
చివరి ఓవర్లలో అభిజ్ఞాన్ కుందు (40), కనిష్క్ చౌహాన్ (నాటౌట్ 37) మెరుపులు మెరిపించడంతో భారత్ నిర్ణీత ఓవర్లలో 9 వికెట్ల నష్టానికి 411 పరుగులు చేసింది. ఇంగ్లాండ్ బౌలర్లలో జేమ్స్ మింటో 3 వికెట్లు పడగొట్టగా, సెబాస్టియన్ మోర్గాన్ మరియు అలెక్స్ గ్రీన్ రెండేసి వికెట్లు తీశారు.
తడబడిన ఇంగ్లాండ్ బ్యాటింగ్
భారీ లక్ష్యంతో బరిలోకి దిగిన ఇంగ్లాండ్‌కు ఆరంభంలోనే ఎదురుదెబ్బ తగిలింది. జోసెఫ్ మూర్స్ (17) త్వరగానే అవుట్ కాగా, బెన్ డాకిన్స్ మరియు బెన్ మేయర్ రెండో వికెట్‌కు 74 పరుగులు జోడించారు. అయితే మేయర్ (45) అవుట్ అయిన తర్వాత ఇంగ్లాండ్ వికెట్లను వరుసగా కోల్పోయింది.
ఒకవైపు బెన్ డాకిన్స్ (66) పోరాడినా, మధ్యలో 174 నుండి 177 పరుగుల వ్యవధిలోనే ఇంగ్లాండ్ మూడు కీలక వికెట్లు కోల్పోయి మ్యాచ్‌పై పట్టు కోల్పోయింది. చివర్లో కాలేబ్ ఫాల్క్‌నర్ సెంచరీతో మెరిసినా, భారత్ నిర్దేశించిన భారీ లక్ష్యాన్ని చేరుకోవడం ఇంగ్లాండ్‌కు సాధ్యపడలేదు.