చెన్నై: చెన్నైలో కుప్పలో దొరికిన 45 తులాల బంగారాన్ని తిరిగి యజమానికి అప్పగించి తన నిజాయితీని చాటుకున్న పారిశుధ్య కార్మికురాలు పద్మను మలేషియా ప్రభుత్వం గౌరవించింది. ఆమెకు బహుమతిగా బంగారు ఉంగరాన్ని పంపింది.
పద్మ చేసిన ఈ గొప్ప పనికి ఇప్పటికే దేశవ్యాప్తంగా ప్రశంసలు వెల్లువెత్తగా, ఇప్పుడు సముద్రాలు దాటి అంతర్జాతీయ స్థాయిలో గుర్తింపు లభిస్తోంది. పద్మ నిజాయితీకి ముగ్ధుడైన మలేషియా ప్రభుత్వ న్యాయశాఖ మంత్రి కులశేఖరన్, తన సహాయకురాలు వడివుక్కరసిని చెన్నైకి పంపారు. ఆమె పద్మను స్వయంగా కలిసి, మంత్రి పంపిన బంగారు ఉంగరాన్ని ఆమె వేలికి తొడిగారు. అనంతరం మంత్రి కులశేఖరన్ వీడియో కాల్ ద్వారా పద్మతో మాట్లాడి ఆమెను అభినందించారు.
అసలేం జరిగింది?
చెన్నైలోని తిరువల్లికేణికి చెందిన 48 ఏళ్ల పద్మ ఒక పారిశుధ్య కార్మికురాలు. జనవరి 11న టి. నగర్ ప్రాంతంలో పనిలో ఉండగా, ఆమెకు రోడ్డుపై ఒక బ్యాగ్ దొరికింది. అందులో 45 తులాల బంగారు ఆభరణాలు ఉన్నాయి. ఆ క్షణం కూడా ఆశపడకుండా ఆమె వెంటనే ఆ నగలను పాండి బజార్ పోలీస్ స్టేషన్‌లో అప్పగించారు. విచారణలో అవి నంగనల్లూర్‌కు చెందిన పరమేష్ అనే వ్యక్తివిగా తేలడంతో పోలీసులు వాటిని యజమానికి అందజేశారు.
కురుస్తున్న ప్రశంసల జల్లు:
- ముఖ్యమంత్రి ఎం.కె. స్టాలిన్: పద్మ నిజాయితీని మెచ్చుకుంటూ ముఖ్యమంత్రి ఆమెకు రూ. 1 లక్ష నగదు పురస్కారాన్ని అందజేశారు.
- పోస్టల్ శాఖ: పద్మ ఫోటోతో కూడిన ప్రత్యేకమైన ‘మై స్టాంప్’ (My Stamp) పోస్టల్ స్టాంపును విడుదల చేసి గౌరవించింది.
- సూపర్ స్టార్ రజనీకాంత్: స్వయంగా పద్మను తన ఇంటికి పిలిపించుకున్న రజనీకాంత్, ఆమె మెడలో బంగారు గొలుసు వేసి సత్కరించారు.
- నటుడు పార్థిబన్: విలక్షణ నటుడు పార్థిబన్ ఒక అడుగు ముందుకేసి, పద్మను ఒక కార్యక్రమానికి ముఖ్య అతిథిగా తీసుకెళ్లారు. అక్కడ ఆమెకు పాదపూజ చేసి, స్వయంగా ఆమెకు చెప్పులు తొడిగి తన గౌరవాన్ని చాటుకున్నారు. “బంగారం ధర పెరుగుతున్న కొద్దీ మానవత్వం విలువ తగ్గుతున్న ఈ రోజుల్లో, పద్మ గారు నిజమైన ‘ప్రపంచ సుందరి’ (Miss World) గా అవతరించారు” అని ఆయన కొనియాడారు.