షాజహాన్‌పూర్: బీజేపీ నాయకుడికి చెందిన హోటల్‌పై దాడి చేసి, సిబ్బందిని కొట్టిన కేసులో ప్రధాన నిందితుడు ఎట్టకేలకు పట్టుబడ్డాడు. అక్షయ్ కదత్ అనే నిందితుడిని మహారాష్ట్రలోని సతారాలో పోలీసులు అరెస్ట్ చేశారు. విశేషం ఏమిటంటే, నిందితుడు తన పెళ్లి ముగించుకుని, నవవధువుతో కలిసి హనీమూన్‌కు వెళ్లేందుకు సిద్ధమవుతుండగా పోలీసులు అతడిని చుట్టుముట్టారు.
అసలేం జరిగిందంటే? 2025 డిసెంబర్ 19న ఈ ఘటన జరిగింది. షాజహాన్‌పూర్‌లోని తిల్హార్ పోలీస్ స్టేషన్ పరిధిలో బీజేపీ నాయకుడు దివాకర్ సింగ్‌కు చెందిన హోటల్‌పై అక్షయ్ మరియు అతని గ్యాంగ్ దాడి చేశారు. హోటల్ సిబ్బందిని దారుణంగా కొట్టి, అక్కడి ఫర్నిచర్‌ను ధ్వంసం చేశారు. సమాచారం అందుకున్న పోలీసులతో కూడా అక్షయ్ దురుసుగా ప్రవర్తించి తప్పించుకున్నాడు. ఈ కేసులో ఐదుగురిపై కేసు నమోదు చేయగా, ఇద్దరిని ముందే అరెస్ట్ చేశారు. అప్పటి నుండి అక్షయ్ పరారీలో ఉన్నాడు.
సోషల్ మీడియా వీడియోతో చిక్కిన నిందితుడు: నిందితుడి ఆచూకీ తెలిపిన వారికి పోలీసులు రూ. 25,000 బహుమతి కూడా ప్రకటించారు. అతను మహారాష్ట్రలో ఉన్నాడన్న సమాచారంతో యూపీ పోలీసులు అక్కడ నిఘా పెట్టారు. ఈ క్రమంలో గత గురువారం అక్షయ్ వివాహ వేడుకలకు సంబంధించిన వీడియో సోషల్ మీడియాలో వైరల్ అయ్యింది. పోలీసులు వెంటనే పెళ్లి వేదికపై దాడి చేసినప్పటికీ, అప్పట్లో అతను కొద్దిలో తప్పించుకున్నాడు.
చివరికి శనివారం నాడు సతారాలో హనీమూన్‌కు వెళ్లేందుకు సిద్ధమవుతుండగా పోలీసులు అతడిని పట్టుకున్నారు. నిందితుడిని సతారా కోర్టులో హాజరుపరిచామని, ట్రాన్సిట్ రిమాండ్ ద్వారా అతడిని షాజహాన్‌పూర్‌కు తీసుకువస్తామని ఎస్పీ రాజేష్ ద్వివేది తెలిపారు.