‘జననాయగన్’ చిత్రానికి సెన్సార్ సర్టిఫికేట్ ఇవ్వాలంటూ గతంలో సింగిల్ జడ్జి పి.టి. ఆశా ఇచ్చిన ఉత్తర్వులను మద్రాస్ హైకోర్టు ధర్మాసనం రద్దు చేసింది. సెన్సార్ బోర్డు వాదనలను కూడా విని, ఈ కేసును మళ్లీ విచారించాలని ఆదేశించింది. అయితే, న్యాయ పోరాటం వల్ల సమయం వృధా అవుతుందని భావించిన కె.వి.ఎన్ (KVN) ప్రొడక్షన్స్, కోర్టులోని కేసును ఉపసంహరించుకుని సినిమాను మళ్లీ సెన్సార్ (Re-certification) కోసం పంపింది.
సెన్సార్ వివాదం – నేపథ్యం: జనవరి 9న విడుదల కావాల్సిన ఈ చిత్రం సెన్సార్ ఇబ్బందుల వల్ల వాయిదా పడింది. మొదట U/A సర్టిఫికేట్ ఇస్తామని చెప్పిన సెన్సార్ బోర్డు, ఆ తర్వాత నిర్ణయాన్ని మార్చుకుని సినిమాను మళ్లీ పరిశీలించాలని (Re-examine) కోరింది. దీనిపై చిత్ర యూనిట్ కోర్టుకు వెళ్లగా, సినిమాకు వెంటనే U/A సర్టిఫికేట్ ఇవ్వాలని సింగిల్ జడ్జి ఉత్తర్వులు ఇచ్చారు. ఈ తీర్పును సెన్సార్ బోర్డు పై కోర్టులో సవాలు చేసింది.
వివాదాస్పద దృశ్యాలు: భారత సైన్యానికి సంబంధించి ఈ సినిమాలో కొన్ని వివాదాస్పద దృశ్యాలు ఉన్నాయని తమకు ఫిర్యాదులు అందాయని సెన్సార్ బోర్డు తెలిపింది. అందుకే సినిమాను రీ-సెన్సార్ చేయాలని బోర్డు చైర్మన్ నిర్ణయించినట్లు కోర్టుకు వివరించింది. హైకోర్టు ధర్మాసనం సెన్సార్ బోర్డు వాదనలతో ఏకీభవించి, సింగిల్ జడ్జి తీర్పును రద్దు చేసింది.
త్వరలో కొత్త విడుదల తేదీ: తమిళనాడు అసెంబ్లీ ఎన్నికల తేదీ ప్రకటించకముందే సినిమాను విడుదల చేయాలని చిత్ర బృందం భావిస్తోంది. ఎన్నికల కోడ్ అమల్లోకి వస్తే సినిమా విడుదల మరింత కష్టమవుతుంది. అందుకే కోర్టు కేసులతో కాలం గడపడం కంటే, సెన్సార్ బోర్డు సూచించిన మార్పులు చేయడానికి మేకర్స్ అంగీకరించారు. ఈ వారంలోనే రీ-సెన్సార్ కమిటీ సినిమాను చూసి మార్పులను సూచించనుంది. ఆ తర్వాత ‘జననాయగన్’ కొత్త విడుదల తేదీని అధికారికంగా ప్రకటించనున్నారు.