ప్రశ్న: నాకు గత కొన్ని నెలలుగా ఒళ్లు నొప్పులు ఉంటున్నాయి. శరీరంలో చెడు కొలెస్ట్రాల్ ఎక్కువైతే ఇలాగే నొప్పులు వస్తాయని విన్నాను. ఇది నిజమేనా? కొలెస్ట్రాల్ పెరిగినట్లు ఇతర లక్షణాల ద్వారా తెలుసుకోవచ్చా?
సమాధానం: కొలెస్ట్రాల్‌లో చాలా రకాలు ఉన్నాయి. కొన్ని కొవ్వులు శరీర జీవక్రియలకు అవసరం, కానీ కొన్ని రకాల కొవ్వులు (LDL వంటివి) శరీరానికి హాని చేస్తాయి.
నొప్పులకు కారణం: రక్తంలో కొవ్వు పెరిగినప్పుడు, రక్తం యొక్క సాంద్రత (Density) పెరుగుతుంది. దీనివల్ల రక్తనాళాల్లో రక్త ప్రసరణ నెమ్మదిస్తుంది. అప్పుడు చేతులు, కాళ్ల వేళ్లు మరియు పాదాల్లో స్వల్పంగా నొప్పి లేదా సూదితో గుచ్చినట్లు అనిపించవచ్చు. పెద్ద రక్తనాళాల లోపలి గోడలపై కొవ్వు పేరుకుపోవడం వల్ల రక్త ప్రసరణకు ఆటంకం కలుగుతుంది. దీని ఫలితంగా:
- భుజం నొప్పి
- మెడ వెనుక భాగంలో నొప్పి
- దవడ మరియు నోటి భాగంలో నొప్పి రావచ్చు.
వీటన్నిటికంటే ప్రమాదకరమైనది ఛాతీ నొప్పి (Angina). గుండెకు వెళ్లే రక్తనాళాల్లో కొవ్వు (Plaque) పేరుకుపోవడం వల్ల రక్త ప్రసరణ ఆగిపోయి ఈ నొప్పి వస్తుంది.
ఇతర లక్షణాలు: మీరు అడిగినట్లు నొప్పులతో పాటు కొలెస్ట్రాల్ పెరిగినప్పుడు మరికొన్ని లక్షణాలు కూడా కనిపిస్తాయి:
- కళ్ల కింద తెలుపు రంగులో పేరుకుపోవడం (Xanthelasma).
- అనవసరమైన చోట్ల కొవ్వు చేరడం వల్ల బరువు పెరగడం.
- ఎప్పుడూ అలసటగా (Fatigue) అనిపించడం, ఉత్సాహం లేకపోవడం.
- మానసిక ఒత్తిడి మరియు మెదడు మందకొడిగా ఉండటం.
ఏం చేయాలి? కేవలం ‘టోటల్ కొలెస్ట్రాల్’ పరీక్ష మాత్రమే కాకుండా, కనీసం 8 నుండి 10 గంటల పాటు ఖాళీ కడుపుతో ఉండి ‘ఫాస్టింగ్ లిపిడ్ ప్రొఫైల్’ (Fasting Lipid Profile) పరీక్ష చేయించుకోవాలి. రిపోర్టులతో వైద్యుడిని సంప్రదించి సరైన చికిత్స తీసుకోవడం అవసరం.