పుణె: సోషల్ మీడియాలో వైరల్ అవుతున్న ఒక వింత ఘటనలో, ఒక వ్యక్తి తన స్కూటర్‌ను టోయింగ్ (Towing) చేయకుండా అడ్డుకోవడానికి అత్యంత ప్రమాదకరమైన పద్ధతిని ఎంచుకున్నాడు. పోలీసులు తన వాహనాన్ని క్రేన్‌తో పైకి లేపుతున్నా, అతను వాహనం మీద నుండి దిగకుండా అలాగే కూర్చుండిపోయాడు. ఈ దృశ్యాలన్నీ కెమెరాలో రికార్డ్ అవ్వగా, ప్రస్తుతం ఈ వీడియో నెట్ ఇంట హల్చల్ చేస్తోంది.
ఈ వీడియోలో, ఒక రద్దీగా ఉండే మార్కెట్ ప్రాంతంలో ప్రజలంతా ఆశ్చర్యంగా చూస్తుండగా.. సదరు వ్యక్తి స్కూటర్ మీద కూర్చుని ఉండగానే క్రేన్ అతడిని గాలిలోకి కొన్ని అడుగుల ఎత్తుకు లేపడం కనిపిస్తుంది.
ట్రాఫిక్ పోలీసులు నిబంధనలకు విరుద్ధంగా పార్క్ చేసిన వాహనాలపై డ్రైవ్ నిర్వహిస్తున్న సమయంలో ఈ ఘటన జరిగింది. నిబంధనలు ఉల్లంఘించి పార్క్ చేసిన ఆ స్కూటర్‌ను పోలీసులు తరలించడానికి ప్రయత్నించగా, యజమాని అభ్యంతరం వ్యక్తం చేశాడు. తన వాహనాన్ని తీసుకెళ్లనిచ్చేది లేదని భీష్మించుకుని కూర్చున్నాడు. పోలీసులు క్రేన్‌తో వాహనాన్ని గాలిలోకి లేపినా, అతను మొండిగా స్కూటర్ పైనే కూర్చుని ఉన్నాడు.