ఢిల్లీ-డెహ్రాడూన్ హైవే విషాదం: తూర్పు ఢిల్లీలోని ఘాజీపూర్ సమీపంలో NH-9పై గురువారం ఉదయం జరిగిన ఘోర ప్రమాదం ఒక కుటుంబాన్ని ఛిన్నాభిన్నం చేసింది. ఈ ప్రమాదంలో ఇద్దరు మరణించగా, ముగ్గురు తీవ్రంగా గాయపడ్డారు.
ఘటన వివరాలు: పోలీసులు తెలిపిన వివరాల ప్రకారం.. డ్రైవర్ నిద్రమత్తులోకి జారుకోవడంతో వేగంగా వెళ్తున్న SUV కారు, రోడ్డు పక్కన ఆగి ఉన్న ట్రక్కును బలంగా ఢీకొట్టింది. ఈ ప్రమాదంలో నీలం గార్గ్ (55), ఆమె కుమార్తె దీపాంజలి గార్గ్ (38) అక్కడికక్కడే మృతి చెందారు. దీపాంజలి చిన్నపిల్లలు వివాన్ (5), వాషు (3)తో పాటు కారు నడుపుతున్న బంధువు దీపాన్షు (28) తీవ్రంగా గాయపడ్డారు.
వివాహమైన తర్వాత తన మొదటి హోలీ వేడుకను జరుపుకోవాలనే ఉత్సాహంతో, దీపాన్షు తన తల్లి, సోదరి మరియు మేనల్లుళ్లను తీసుకురావడానికి డెహ్రాడూన్ వెళ్ళాడు. తిరుగు ప్రయాణంలో ఈ విషాదం చోటుచేసుకుంది.
అతివేగమే ప్రమాదానికి కారణం: ప్రమాద సమయంలో SUV కారు గంటకు 100 కి.మీ కంటే ఎక్కువ వేగంతో ఉన్నట్లు పోలీసులు గుర్తించారు. ప్రభావం ఎంత బలంగా ఉందంటే.. కారు ఎడమ భాగం పూర్తిగా నుజ్జునుజ్జు అయింది. వెనుక సీట్లో కూర్చున్న నీలం గార్గ్ కారు నుండి బయట పడిపోయారు. వాహనం లోపల చిక్కుకున్న వారిని బయటకు తీయడానికి రెస్క్యూ టీమ్ కారును కట్ చేయాల్సి వచ్చింది.
కుటుంబ సభ్యులు తెలిపిన వివరాల ప్రకారం.. దీపాన్షు బియ్యం వ్యాపారం చేస్తాడు. హోలీ పండుగ కోసం పిల్లలకు రంగులు, వాటర్ గన్‌లు కొనేందుకు సిద్ధమవుతుండగా, అంతలోనే ఇద్దరి అంత్యక్రియలు జరపాల్సి రావడం అత్యంత విషాదకరమని నీలం సోదరుడు కన్నీటి పర్యంతమయ్యారు.