ఉత్తరప్రదేశ్‌లోని ఔరయ్యా జిల్లాకు చెందిన ఒక యువతికి సంబంధించిన ఇన్‌స్టాగ్రామ్ వీడియో వైరల్ అవుతోంది. తాను తన ఇష్టపూర్వకంగానే ఇంటి నుండి పారిపోయానని, వీడియోలో కనిపిస్తున్న యువకుడిని పెళ్లి చేసుకున్నానని ఆ యువతి స్పష్టం చేసింది.
వీడియోలో ఉన్న యువకుడిని తన భర్తగా పరిచయం చేస్తూ, తన అత్తగారి కుటుంబంపై లేదా భర్తపై ఎలాంటి కేసు పెట్టవద్దని ఆమె విజ్ఞప్తి చేసింది. అంతకుముందు ఆ యువతి తన పడకపై ‘పాము కుబుసాన్ని’ (Snake skin) వదిలి వెళ్లడంతో, ఆమె నాగినిగా మారిపోయి అదృశ్యమైందని అందరూ ఆందోళన చెందారు.
అసలేం జరిగింది?: ఫఫూంద్ పోలీస్ స్టేషన్ పరిధిలోని సీగంన్‌పూర్ గ్రామంలో రహస్యంగా అదృశ్యమైన ఈ యువతి కేసు ఇప్పుడు కొత్త మలుపు తిరిగింది. ఆదివారం రాత్రి ఇంట్లో పడుకున్న యువతి సోమవారం ఉదయం కనిపించకుండా పోయింది. కుటుంబ సభ్యుల కథనం ప్రకారం.. ఉదయం నిద్రలేపడానికి వెళ్లేసరికి మంచంపై ఆమె బట్టలు, నగలు ఉన్నాయి. అంతటితో ఆగకుండా, అక్కడ ఐదు అడుగుల పొడవైన పాము కుబుసం కూడా కనిపించింది. దీంతో ఆ ప్రాంతంలో రకరకాల పుకార్లు మొదలయ్యాయి. కొందరు మూఢనమ్మకాలతో ఆమె నాగినిగా మారి మాయమైందని ప్రచారం చేశారు. ఈ వార్త సోషల్ మీడియాలో కూడా విపరీతంగా వైరల్ అయ్యింది.
వీడియోతో వీడిన మిస్టరీ: ప్రస్తుతం ఆ యువతి (రీనా) తన ఇన్‌స్టాగ్రామ్ ఖాతాలో రెండు వీడియోలను అప్‌లోడ్ చేసి అసలు నిజాన్ని బయటపెట్టింది. మొదటి వీడియోలో ఒక యువకుడితో కలిసి కనిపిస్తూ, తమ ఇద్దరి సమ్మతితోనే పెళ్లి జరిగిందని చెప్పింది. రెండో వీడియోలో ఎవరూ తనను బలవంతం చేయలేదని, పెళ్లి నిర్ణయం తనదేనని స్పష్టం చేసింది. అనవసరంగా తమ కుటుంబ సభ్యులను వేధించవద్దని కోరింది.
పోలీసులు ఈ వీడియోపై స్పందిస్తూ.. యువతి ఆచూకీ కోసం బృందాలను పంపామని, దర్యాప్తు కొనసాగుతోందని తెలిపారు. ఈ వీడియో బయటకు రావడంతో ఆమె నాగినిగా మారిందన్న పుకార్లకు తెరపడింది.