వయస్సు అనేది కేవలం ఒక సంఖ్య మాత్రమేనని కర్తార్ సింగ్ తోమర్ నిరూపిస్తున్నారు. హర్యానాకు చెందిన 89 ఏళ్ల ఈ రిటైర్డ్ ఐపీఎస్ అధికారి, బెంగళూరులోని తన నివాసానికి సంబంధించిన ‘హోమ్ టూర్ వ్లాగ్’తో ఇంటర్నెట్ సెన్సేషన్‌గా మారారు. ‘మనసుమ్ సీనియర్ లివింగ్’ షేర్ చేసిన ఈ వీడియోలో తోమర్ ఎంతో ఉత్సాహంగా కనిపిస్తున్నారు.
మనసును హత్తుకునే హోమ్ టూర్: కాషాయ రంగు కుర్తా, సాంప్రదాయ హిమాచలీ టోపీ ధరించిన తోమర్, ఒక అనుభవం ఉన్న వ్లాగర్‌లా వీక్షకులను తన ఇంట్లోకి ఆహ్వానించారు. “మొదటిసారి నేను నా ఫ్లాట్ గురించి వ్లాగ్ చేస్తున్నాను” అని చెబుతూ తన ఇంటిని గర్వంగా చూపించారు. “నా పేరు కర్తార్ సింగ్ తోమర్, హర్యానా కేడర్ రిటైర్డ్ ఐపీఎస్ అధికారిని. నా వయస్సు 89 ఏళ్లు, నేను నా జీవితాన్ని ఆస్వాదిస్తున్నాను. ఈ 1 BHK ఫ్లాట్ నాకు స్వర్గం లాంటిది” అని ఆయన పేర్కొన్నారు.
ప్రశాంతమైన జీవనం: ఈ వీడియోలో తన ఇంటి విశేషాలను ఆయన వివరించారు. హాల్‌లో సోఫా-కమ్-బెడ్, డైనింగ్-కమ్-స్టడీ టేబుల్ ఉన్నాయి. వృద్ధుల భద్రత కోసం బాత్‌రూమ్‌లో ఏర్పాటు చేసిన ‘యాంటీ-స్కిడ్’ (జారిపోని) ఫ్లోరింగ్‌ను ఆయన ప్రత్యేకంగా మెచ్చుకున్నారు. బెడ్‌రూమ్‌లోని కిటికీల నుండి వచ్చే గాలి వల్ల ఫ్యాన్ అవసరమే ఉండదని, బాల్కనీ నుండి కనిపించే పచ్చదనం, కాలుష్యం లేని వాతావరణం తనకు ఎంతో ప్రశాంతతను ఇస్తున్నాయని తోమర్ తెలిపారు.
ఈ వీడియోపై నెటిజన్లు ప్రశంసల వర్షం కురిపిస్తున్నారు. “ఎంత సంతోషకరమైన వ్యక్తి! జీవితాన్ని ఎలా ఆస్వాదించాలో చూపిస్తున్నారు” అని ఒకరు వ్యాఖ్యానించగా, మరొకరు “సార్, మీ జూనియర్ సహోద్యోగి నుండి మీకు గౌరవపూర్వక వందనాలు” అని పేర్కొన్నారు.