దేశవ్యాప్తంగా కుల సమస్యలు ఇంకా కొనసాగుతూనే ఉన్నాయి. ఏదో ఒక రూపంలో ప్రజలు కుల వివక్షకు గురవుతూనే ఉన్నారు, ముఖ్యంగా ప్రేమ వివాహాల విషయంలో ఇది తీవ్రంగా ఉంటుంది. అయితే, మహారాష్ట్రలోని అహిల్య నగర్ జిల్లాకు చెందిన సౌండాలా గ్రామం కుల వివక్ష నుంచి విముక్తి పొంది సరికొత్త చరిత్రను సృష్టించింది.
గత చరిత్ర: ఒకప్పుడు ఈ జిల్లా కుల వివక్షకు, దాడులకు పెట్టింది పేరు. 2013లో సోనాయ్ గ్రామంలో, 2014లో జావ్‌ఖేడేలో పరువు హత్యలు (Honour Killings) జరిగాయి. అటువంటి ప్రాంతంలో ఉన్న సౌండాలా గ్రామం ఇప్పుడు కుల రహిత గ్రామంగా అవతరించింది.
చారిత్రాత్మక తీర్మానం: సౌండాలా గ్రామ సర్పంచ్ శరత్ రావు, గ్రామస్తులందరినీ ఒకచోట చేర్చి కుల వివక్షకు వ్యతిరేకంగా తీర్మానం ప్రవేశపెట్టారు. “మన రక్తం పచ్చగానో, నీలంగానో ఉండదు.. అందరి రక్తం ఎరుపు రంగులోనే ఉంటుంది. ఒక్కసారి రక్తం కలిస్తే దానిని వేరు చేయలేము” అంటూ ఆయన భావోద్వేగంగా ప్రసంగించారు.
గ్రామస్తులందరూ ఏకగ్రీవంగా ఈ తీర్మానానికి మద్దతు తెలిపారు. “ఇకపై సౌండాలా గ్రామంలో ఎవరూ కులాన్ని పాటించరు, వివక్ష చూపరు. గ్రామస్తులందరూ అనుసరించే ఏకైక మతం మానవత్వం మాత్రమే” అని ఆ తీర్మానంలో పేర్కొన్నారు.
ముఖ్యమైన నిర్ణయాలు:
- కులం, మతం, జాతి ప్రాతిపదికన ఎటువంటి వివక్ష ఉండదు.
- ప్రభుత్వ సేవలు, నీటి వనరులు, ఆలయాలు, స్మశానవాటికలు, పాఠశాలలు మరియు సామాజిక వేడుకల్లో అందరూ సమానంగా పాల్గొనవచ్చు.
- కుల వివక్షకు వ్యతిరేకంగా సామాజిక చైతన్యం పెరగడంతో గతంలో ఉన్న ఎస్సీ/ఎస్టీ అట్రాసిటీ కేసులు గణనీయంగా తగ్గాయి.
- ఎవరైనా ఈ నియమాలను ఉల్లంఘిస్తే వారికి జరిమానా విధిస్తారు. దీనిని పర్యవేక్షించడానికి గ్రామంలోని ముఖ్య కూడళ్లలో సిసిటివి కెమెరాలు కూడా ఏర్పాటు చేశారు.