న్యూఢిల్లీ: భారత క్రికెట్ జట్టు మాజీ సెలెక్టర్ జతిన్ పరంజపే ఎంఎస్ ధోనీ కెప్టెన్సీకి సంబంధించి ఒక పెద్ద నిజాన్ని వెల్లడించారు. ధోనీ తనంతట తానుగా కెప్టెన్సీని వదులుకోలేదని, అలా చేయమని అతనికి సూచించారని ఆయన తెలిపారు.
జనవరి 2017లో జరిగిన ఒక ముఖ్యమైన చర్చ గురించి జతిన్ వివరించారు. దీని తర్వాతే ధోనీ పరిమిత ఓవర్ల కెప్టెన్సీ నుండి తప్పుకోవాలని నిర్ణయించుకున్నారు. 4 జనవరి 2017న ఇంగ్లాండ్‌తో సిరీస్‌కు ముందు ధోనీ వన్డే, టీ20 కెప్టెన్సీకి రాజీనామా చేశారు.
ధోనీ కెప్టెన్సీ ఎందుకు వదులుకోవాల్సి వచ్చింది? ధోనీ నాయకత్వంలో టీమ్ ఇండియా మూడు ఐసీసీ ట్రోఫీలను గెలుచుకుంది. 2014లో టెస్టుల నుండి తప్పుకున్నాక, అతను వన్డేలు మరియు టీ20లపై దృష్టి పెట్టారు. అయితే 2015 వరల్డ్ కప్, 2016 టీ20 వరల్డ్ కప్‌లలో భారత్ సెమీఫైనల్‌లోనే వెనుదిరిగింది. దీంతో 2019 వరల్డ్ కప్ కోసం జట్టును సిద్ధం చేసే ‘ప్రక్రియ’లో భాగంగా మార్పు అవసరమని సెలెక్టర్లు భావించారు.
ఆ రాత్రి ఏం జరిగింది? పరంజపే ‘ది గ్రేట్ ఇండియన్ క్రికెట్ షో’లో మాట్లాడుతూ.. “నాగ్‌పూర్‌లో ధోనీ గంటసేపు బ్యాటింగ్ ప్రాక్టీస్ చేశాడు. నేను, ఎమ్మెస్కే ప్రసాద్ అతనికి ఎలా చెప్పాలో అని ఎదురుచూశాం. చివరికి ధోనీ దగ్గరకు వెళ్లి, ‘మహీ, కెప్టెన్సీ నుండి ముందుకు సాగడానికి (తప్పుకోవడానికి) ఇదే సరైన సమయం అని మేము భావిస్తున్నాం’ అని చెప్పాం. దానికి ధోనీ వెంటనే స్పందిస్తూ.. ‘అన్నా (ఎమ్మెస్కేను ఉద్దేశించి), ఇది సరైన నిర్ణయం. నేను ఏం చేయాలో చెప్పండి’ అన్నాడు. రాతపూర్వకంగా ఇవ్వాలని కోరగా, అదే రాత్రి ‘నేను కెప్టెన్సీ నుండి తప్పుకుంటున్నాను’ అని ధోనీ ఈమెయిల్ పంపాడు” అని వివరించారు.