భారతదేశం నుండి విదేశాలకు వెళ్లి ఉద్యోగాలు చేయడం సాధారణ విషయమే. చదువుకున్న యువత నుండి సామాన్యుల వరకు ఎందరో ఉపాధి కోసం విదేశాలకు వెళ్తుంటారు. ముఖ్యంగా భారతీయులు ఎక్కువగా అరబ్ దేశమైన దుబాయ్‌కు ప్రయాణిస్తుంటారు.
విదేశాలకు వెళ్లాలంటే పాస్‌పోర్ట్ తప్పనిసరి. ఉద్యోగం కోసమైనా లేదా పర్యాటకానికైనా పాస్‌పోర్ట్ ఉంటేనే ఇతర దేశాలకు వెళ్లడం సాధ్యమవుతుంది. అయితే, కాలక్రమేణా ఆయా దేశాలు తమ నిబంధనలను మారుస్తుంటాయి. తాజాగా ఐక్య అరబ్ ఎమిరేట్స్ (UAE) వెళ్లే వారికి లేదా అక్కడ ఉండేవారికి భారత ప్రభుత్వం ‘ఈ-పాస్‌పోర్ట్’ (e-Passport) అనే కొత్త విధానాన్ని అందుబాటులోకి తెచ్చింది.
ఈ-పాస్‌పోర్ట్ వల్ల ప్రయోజనాలు: మీరు దుబాయ్‌లో ఉంటున్నా లేదా అక్కడికి వెళ్లాలని ప్లాన్ చేస్తున్నా మీ పాస్‌పోర్ట్‌ను ఈ-పాస్‌పోర్ట్‌గా మార్చుకోవడం మంచిది. దీనివల్ల ప్రయాణం సురక్షితంగా మారుతుంది. డాక్యుమెంట్ల వెరిఫికేషన్ మరియు తనిఖీలు చాలా సులభం అవుతాయి. ముఖ్యంగా ఇమ్మిగ్రేషన్ వద్ద గంటల తరబడి వేచి ఉండాల్సిన అవసరం ఉండదు.
సాంకేతికత: ఈ రకమైన పాస్‌పోర్ట్‌లో RFID చిప్‌ను పాస్‌పోర్ట్ ముందు భాగంలో అమర్చుతారు. ఈ చిప్‌లో ప్రయాణికుడి ఫోటో, వేలిముద్రలు మరియు కంటి పాప (Iris) సమాచారం నిక్షిప్తమై ఉంటుంది. విమానాశ్రయాల్లో మీ వివరాలను ధృవీకరించడం సెకన్లలో పూర్తవుతుంది.
ఎలా దరఖాస్తు చేయాలి? UAEలో ఉంటున్న భారతీయులు అబుదాబిలోని భారత రాయబార కార్యాలయం లేదా దుబాయ్‌లోని కాన్సులేట్‌కు వెళ్లి ఈ-పాస్‌పోర్ట్ కోసం దరఖాస్తు చేసుకోవచ్చు. ఆన్‌లైన్ ద్వారా https://mportal.passportindia.gov.in వెబ్‌సైట్‌లో డాక్యుమెంట్లు సమర్పించి అపాయింట్‌మెంట్ తీసుకోవాలి.