న్యూఢిల్లీ: కాంగ్రెస్ నాయకుడు రాహుల్ గాంధీ అంటే తనకు ఇష్టమేనని, అయితే ఆయన తప్పుడు ‘వృత్తి’ని ఎంచుకున్నారని ప్రముఖ జ్యోతిష్కురాలు జై మదాన్ వ్యాఖ్యానించారు. ఎకనామిక్ టైమ్స్ గ్లోబల్ బిజినెస్ సమ్మిట్‌లో జరిగిన ఒక ఇంటర్వ్యూలో ఆమె ఈ ఆసక్తికర అంచనాలను వెల్లడించారు.
రాహుల్ గాంధీ ప్రధాని అవుతారా? టైమ్స్ నౌ ఎడిటర్ ఇన్ చీఫ్ నవికా కుమార్ అడిగిన ‘రాహుల్ గాంధీ ఎప్పటికైనా ప్రధాని అవుతారా?’ అనే ప్రశ్నకు జై మదాన్ స్పందిస్తూ.. “నాకు ఆ వ్యక్తి ఇష్టం, కానీ ఆయన తప్పుడు వృత్తిలో ఉన్నారు” అని చెప్పారు. రాహుల్ గాంధీకి ఏ రంగాలు సరిపోతాయని అడగ్గా.. “ఆయన మంచి వ్యక్తి. ఆయన హోటల్ పరిశ్రమ, రెస్టారెంట్ రంగం లేదా మీడియా రంగాలపై దృష్టి సారించాలి. ముఖ్యంగా మీడియా రంగంలో ఆయన అద్భుతంగా రాణించగలరు” అని ఆమె అభిప్రాయపడ్డారు.
నరేంద్ర మోదీ భవిష్యత్తు: ప్రధాని నరేంద్ర మోదీ రాజకీయ భవిష్యత్తుపై కూడా జై మదాన్ తన అభిప్రాయాన్ని పంచుకున్నారు. మోదీ ఎంతకాలం అధికారంలో ఉంటారన్న ప్రశ్నకు.. “నన్ను అడిగితే ఆయన ఇప్పటికే చరిత్రలో నిలిచిపోయారు. భౌతికంగా చూస్తే, ఆయన తన పదవీ కాలాన్ని పూర్తి చేయడాన్ని నేను చూస్తున్నాను” అని చెప్పారు. అలాగే తూర్పు భారతదేశంలో పెద్ద రాజకీయ మార్పులు వస్తాయని ఆమె సూచించారు. “బెంగాల్‌లో అద్భుతాలు జరుగుతాయి. అక్కడ మార్పు ఇప్పటికే మొదలైంది” అని ఆమె పేర్కొన్నారు.
రాజకీయ నిష్పాక్షికత: తాను ఏ రాజకీయ పార్టీకి కొమ్ముకాయడం లేదని జై మదాన్ స్పష్టం చేశారు. “నేను బిజెపి లేదా మోదీ అనుకూల వ్యక్తినని మీరు అనుకుంటే, నేను నా దేశానికి అనుకూలమని చెప్పాలనుకుంటున్నాను. దేశం కోసం, ప్రజల కోసం పనిచేసే ఎవరైనా నాకు హీరోనే” అని ఆమె చెప్పుకొచ్చారు. జ్యోతిష్య రంగం 2030 నాటికి ప్రపంచవ్యాప్తంగా 20 బిలియన్ డాలర్ల పరిశ్రమగా ఎదుగుతుందని ఆమె జోస్యం చెప్పారు.