ప్రస్తుత కాలంలో పెరుగుతున్న ధరల దృష్ట్యా ఇంట్లోని ఎల్‌పీజీ గ్యాస్ (LPG Gas) ఆదా చేయడం చాలా అవసరం. సాధారణంగా ఒక కుటుంబానికి గ్యాస్ సిలిండర్ రెండు నుండి మూడు నెలల వరకు వస్తుంది. కానీ, మనం చేసే కొన్ని చిన్న చిన్న తప్పుల వల్ల గ్యాస్ వృథా అయ్యి సిలిండర్ త్వరగా ఖాళీ అవుతుంది. ఈ క్రింది చిట్కాలను పాటిస్తే మీరు గ్యాస్‌ను చాలా వరకు ఆదా చేయవచ్చు:
- బర్నర్ శుభ్రత: గ్యాస్ బర్నర్ రంధ్రాలలో చెత్త లేదా మురికి పేరుకుపోతే మంట నీలం రంగులో కాకుండా పసుపు రంగులో వస్తుంది. పసుపు రంగు మంట అంటే గ్యాస్ వృథా అవుతుందని అర్థం. అందుకే బర్నర్లను ఎప్పుడూ శుభ్రంగా ఉంచుకోవాలి.
- తడి పాత్రలను వాడకండి: చాలామంది పాత్రలను కడిగిన వెంటనే తడిగా ఉన్నప్పుడే గ్యాస్ మీద పెడతారు. ఆ నీరు ఆరిపోవడానికే గ్యాస్ ఎక్కువ ఖర్చవుతుంది. కాబట్టి పాత్రలను పొడి గుడ్డతో తుడిచిన తర్వాతే వాడండి.
- ఫ్రిజ్ వస్తువుల విషయంలో జాగ్రత్త: ఫ్రిజ్ నుండి తీసిన పాలు లేదా కూరగాయలు చాలా చల్లగా ఉంటాయి. వాటిని నేరుగా గ్యాస్ మీద పెడితే వేడవడానికి రెట్టింపు గ్యాస్ అవసరమవుతుంది. వండే ముందు వాటిని కనీసం 15-20 నిమిషాల ముందే ఫ్రిజ్ నుండి బయట పెట్టి సాధారణ ఉష్ణోగ్రతకు రానివ్వాలి.
- వంటకు ముందే సిద్ధం: గ్యాస్ వెలిగించిన తర్వాత కూరగాయలు కోయడం కంటే, వంటకు కావాల్సినవన్నీ ముందే సిద్ధం చేసుకోవాలి. అలాగే వంట చేసేటప్పుడు పాత్రలపై మూత పెట్టడం మర్చిపోకండి, దీనివల్ల ఆవిరి బయటకు పోకుండా ఆహారం త్వరగా ఉడుకుతుంది.
- నానబెట్టడం: పప్పు లేదా బియ్యం ఉడికించే ముందు అరగంట పాటు నీటిలో నానబెడితే అవి త్వరగా మెత్తబడతాయి మరియు తక్కువ గ్యాస్‌తో ఉడుకుతాయి.
- పాత్రల పరిమాణం: బర్నర్ సైజుకు తగ్గట్టుగా పాత్రలను ఎంచుకోండి. చిన్న పాత్ర కోసం పెద్ద బర్నర్ వాడితే మంట పాత్ర బయటకు వచ్చి వృథా అవుతుంది.