సాధారణంగా ఇంటర్మీడియట్‌లో బైపీసీ (Biology, Physics, Chemistry) చదివిన వారు మాత్రమే డాక్టర్లు కావడానికి అర్హులు. కానీ ఇప్పుడు కేంద్ర ప్రభుత్వం ఈ విధానంలో కీలక మార్పులు చేసింది. నేషనల్ మెడికల్ కమిషన్ (NMC) మెడికల్ ప్రవేశ నిబంధనలను సవరించింది.
ఇకపై 12వ తరగతిలో ఎంపీసీ (PCM – Physics, Chemistry, Maths) తీసుకున్న విద్యార్థులు కూడా డాక్టర్ అయ్యే అవకాశం ఉంది. వీరు బయాలజీని అదనపు సబ్జెక్టుగా (Additional Subject) రాసి పాస్ అయితే, నీట్-యూజీ (NEET-UG) పరీక్షకు హాజరు కావచ్చు. ఈ నిర్ణయం వల్ల లక్షలాది మంది విద్యార్థులకు వైద్య విద్య వైపు మార్గం సుగమమైంది.
కొత్త మార్పు ఏమిటి? పాత నిబంధనల ప్రకారం, మెడికల్ ప్రవేశానికి 11 మరియు 12వ తరగతులలో బయాలజీ ఒక ప్రధాన సబ్జెక్టుగా ఉండాలి. NMC ఇప్పుడు ఆ నిబంధనను తొలగించింది. ఫిజిక్స్, కెమిస్ట్రీ, మ్యాథ్స్ చదివిన విద్యార్థులు ఏదైనా గుర్తింపు పొందిన బోర్డు నుండి బయాలజీ లేదా బయోటెక్నాలజీని అదనపు సబ్జెక్టుగా పాస్ అయితే నీట్ పరీక్ష రాసేందుకు అర్హులవుతారు. నీట్‌లో ఉత్తీర్ణులైన వారు భారత్‌తో పాటు విదేశాల్లో కూడా MBBS, BDS కోర్సుల్లో చేరవచ్చు.
స్ట్రీమ్ మార్చుకునే స్వేచ్ఛ: 10వ తరగతి తర్వాత తొందరపాటుతోనో లేదా ఒత్తిడితోనో ఎంపీసీ తీసుకున్న విద్యార్థులకు ఇది పెద్ద ఊరట. గతంలో వీరు మెడికల్ వైపు రావాలంటే మళ్ళీ రెండేళ్లు ఇంటర్ బయాలజీతో చదవాల్సి వచ్చేది. కానీ ఇప్పుడు కేవలం ఒక సబ్జెక్టు పరీక్ష రాస్తే సరిపోతుంది. దీనివల్ల విద్యార్థులకు ఇంజనీరింగ్ మరియు మెడికల్ రెండు ఆప్షన్లు అందుబాటులో ఉంటాయి.
వయోపరిమితి మరియు అర్హత మార్కులు:
- కనీస వయస్సు: ప్రవేశం పొందే సంవత్సరంలో డిసెంబర్ 31 నాటికి 17 ఏళ్లు నిండి ఉండాలి. గరిష్ట వయోపరిమితి ప్రస్తుతం ఏదీ లేదు.
- కనీస మార్కులు: జనరల్ కేటగిరీ విద్యార్థులకు 12వ తరగతిలో PCB (Physics, Chemistry, Biology) లో కనీసం 50% మార్కులు ఉండాలి.
- రిజర్వేషన్ మినహాయింపు: OBC, SC, ST విద్యార్థులకు 40%, దివ్యాంగులకు 45% మార్కులు అవసరం.