చికెన్ ఎక్కువగా తినే వారికి జీర్ణకోశ క్యాన్సర్ మరియు మరణాల ముప్పు పెరుగుతుందని ఇటీవల జరిగిన ఒక పరిశోధన హెచ్చరించింది. ప్రపంచవ్యాప్తంగా మాంసాహారుల మొదటి ఎంపిక చికెన్. ఇది వండటం సులభం, రుచికరంగా ఉండటంతో పాటు రెడ్ మీట్ కంటే ఆరోగ్యకరమైనదిగా భావిస్తారు. ధర తక్కువ కావడంతో చాలామంది వారానికి రెండు మూడు సార్లు చికెన్ తింటుంటారు.
పరిశోధనలోని ముఖ్యాంశాలు: ప్రతిరోజూ కొంచెం చికెన్ తింటే ఏమీ కాదని చాలామంది అనుకుంటారు. కానీ ‘న్యూట్రిషన్స్’ జర్నల్‌లో ప్రచురితమైన అధ్యయనం ప్రకారం, వారానికి 300 గ్రాముల కంటే ఎక్కువ చికెన్ తినే వారిలో జీర్ణకోశ క్యాన్సర్ (పెద్ద ప్రేగు, మలద్వార క్యాన్సర్) మరియు మరణాల ముప్పు 27 శాతం పెరుగుతున్నట్లు తేలింది. వారానికి 100 గ్రాముల కంటే తక్కువ తినే వారితో పోలిస్తే, ఎక్కువ తినే వారిలో ఈ ముప్పు అధికంగా ఉందని, ముఖ్యంగా పురుషులలో ఈ ప్రభావం ఎక్కువగా ఉందని పరిశోధకులు గుర్తించారు.
గణాంకాలు: సుమారు 4,000 మందిపై 19 ఏళ్ల పాటు సాగిన ఈ అధ్యయనంలో 1,028 మంది మరణించారు. వీరి ఆహార అలవాట్లను పరిశీలించగా, వైట్ మీట్ (కోడి మాంసం) వాటా ఎక్కువగా ఉన్న వారిలో క్యాన్సర్ మరణాల ముప్పు రెట్టింపు అవుతున్నట్లు తేలింది.
నిపుణుల సూచన: అమెరికా ఆహార మార్గదర్శకాల (2020-2025) ప్రకారం, వారానికి 1 నుండి 3 సార్లు, ఒక్కోసారి 100 గ్రాములకు మించకుండా చికెన్ తినాలని సూచిస్తున్నారు. దీనిని మించితే ఆరోగ్య సమస్యలు తప్పవు.