షార్జా: కళ్లముందే తన ఏకైక కుమారుడి ప్రాణాలను బలిగొన్న ప్రమాదానికి కారణమైన డ్రైవర్‌ను క్షమించి ఒక మలయాళీ దంపతులు మానవత్వాన్ని చాటుకున్నారు.
షార్జాలోని మువైలాలో గత బుధవారం జరిగిన రోడ్డు ప్రమాదంలో రెండేళ్ల అలన్ రూమి మరణించాడు. ఈ ప్రమాదానికి కారణమైన డ్రైవర్‌పై తమకు ఎటువంటి ఫిర్యాదు లేదని చిన్నారి తల్లిదండ్రులు అధికారులకు తెలియజేశారు. కేరళలోని మలప్పురం జిల్లా చట్టిపరంబకు చెందిన షరఫుద్దీన్, సఫ్నా దంపతుల కుమారుడే ఈ అలన్ రూమి. షరఫుద్దీన్ దుబాయ్‌లోని ‘తలాల్ గ్రూప్’లో సేల్స్‌మెన్‌గా పనిచేస్తున్నాడు.
అసలేం జరిగింది?
తండ్రిని చూడటం కోసం అలన్ తన తల్లితో కలిసి గత నెల 18న రెండు నెలల విజిట్ వీసాపై యూఏఈకి వచ్చాడు. మువైలాలోని వారి నివాసం సమీపంలో ఇసుకతో కూడిన పార్కింగ్ ఏరియాలో ఈ ప్రమాదం జరిగింది. షరఫుద్దీన్ పని ముగించుకుని ఇంటికి వస్తుండగా, ఆయన కోసం భార్యాపిల్లలు ఎదురుచూస్తున్నారు. ఆ సమయంలో తల్లి చెత్త పారవేయడానికి వెళ్లగా, అలన్ ఒక్కసారిగా పరుగెత్తాడు. అదే సమయంలో పార్కింగ్ నుండి కారును బయటకు తీస్తున్న ఒక పొరుగు వ్యక్తి ఆ చిన్నారిని గమనించలేదు. కారు తగలడంతో తీవ్రంగా గాయపడిన అలన్‌ను అదే డ్రైవర్ వెంటనే ప్రైవేట్ ఆసుపత్రికి తరలించినప్పటికీ, అంతర్గత రక్తస్రావం కారణంగా చిన్నారి ప్రాణాలు కోల్పోయాడు.
ఫిర్యాదు లేదని లిఖితపూర్వకంగా వెల్లడి:
ప్రమాదం తర్వాత పోలీసులు డ్రైవర్‌ను అదుపులోకి తీసుకున్నారు. అయితే, తండ్రి షరఫుద్దీన్ పోలీసులతో మాట్లాడుతూ.. “మాకు జరిగిన నష్టాన్ని ఎవరూ పూడ్చలేరు. కానీ, తెలియక జరిగిన పొరపాటుకు మరో కుటుంబాన్ని కూడా నాశనం చేయడం మాకు ఇష్టం లేదు” అని చెప్పారు. కేరళకు తిరుగుపయనమయ్యే ముందు ఈ జంట అధికారులకు లిఖితపూర్వక లేఖను సమర్పించింది. దుబాయ్‌లో చిన్నారి అంత్యక్రియలు ముగించుకుని దంపతులు కేరళకు తిరిగి వెళ్లారు.
చిదిమిన కలలు:
2018లో వివాహమైన ఈ దంపతులకు ఆరేళ్ల నిరీక్షణ తర్వాత అలన్ జన్మించాడు. ఏప్రిల్ 23న అలన్ రెండో పుట్టినరోజును జరుపుకోవాలని, అలాగే రంజాన్ పండుగను తండ్రితో కలిసి జరుపుకోవాలని ఎన్నో కలలతో యూఏఈకి వచ్చారు. కానీ విధి మరోలా తలచింది.